Aizawl: Congress party chuan Mualpui-a TATA Trust Academy tihtawp chhanah MNF sorkar an puh.
Nimina an thuchhuahah Congress party chuan Mualpui-a TATA Trust Football Academy tihtawp chhanah MNF sorkar puhin Mizo naupangten an chhawr tangkai tak chu MNF sorkarin a ngaihsak that duh loh avang leh TATA Trust hotute hnenah sum thahnem tak a dil avanga an hotute lungawi loin an tihtawp tih an sawi.
Thuchhuah chuan kum 2018 khan Congress sorkar leh TATA Trust tangkawpin TATA Trust Football Academy, Centre of Excelllence, Mualpui hmunah an din tih an sawi a. Kum 2024 thlenga thawhhona thuthlung siam a nih thu leh, he academy chhuah naupang zingah India Junior-a tel eng emaw zat an awm tawh thu te, Bengaluru FC leh Athletico Madrid Academy zawm pawh an awm tawh thu an sawi.
Congress party chuan Mizo naupang tam takin hun reilo te chhunga heti khawpa an chhawr tangkai tihtawp a ni tur chu pawi an tih thu an sawi a. “Sum leh pai ei theih tur zawnga project lian pui pui siam ringawt ngaihtuah loa Mizo naupang infiammite ngaihtuah zawk turin Congress party chuan Sport Minister Pu Robert Romawia Royte hi kan ngen a ni,” an ti.