Aizawl: Agriculture Minister C Lalrinsanga chuan kuminah SEDP hnuaiah vaimim metric tone 5,000 thar chhuah beisei a nih thu a sawi.
Mizoram State Agriculture, Horticulture, Forestry & Marketing Co-operative Federation Ltd (MAHFED)-in nimina General Body Meeting vawi 24-na Aijal Club-ah an hman a telpuinaah agriculture minister chuan vaimim thar chhuah an inbeisei zat hi a sawi chhuak.
C Lalrinsanga chuan sorkar flagship programme hnuaiah vaimim leh bekang chin a nih thu sawiin Lunglei leh Mizoram hmun 12 laiah Cold Storage siam tum mek a nih thu te, thlai chi pawh, phai atanga lak luh ngai lovin, Mizoram chhunga mi ngei hman a nih zel theih nan sorkarin theihtawp a chhuah mek thu a sawi.
Cooperation minister chuan cooperative society hlawhtling tur chuan thawhhona tha a tul hle a, tanrualna tha leh tha lo rah chu hlawhtlinna emaw, tlukchhiatna emaw a thlen thei tih a sawi a, “Thawhhonaah chuan rinawmna a pawimawh ber a, rinawmna tel lo chuan pawlin a tum a hlen chhuak thei ngai lo va, hmasawnna leh hlawhtlinna ai chuan nghirnghona leh pawl kehchhiatna a thlen thei hial,” a ti.
Cooperative movement chu Act & Rules nei thlap a nih angin dan ang zela hnathawh leh hmalak chu duhthusam a nih thu sawiin, member kalkhawm zawng zawngte pawhin Act & Rules te zirchiang turin a chah.
Chawhnua rorel inkhawm an neihah district tinah district level PACS MAHFED LTD din te, thlai thar chhuah sawngbawl leh ram pawna a hralhna zawn te, chhawhchhi, hmarcha, sawhthing, hmunphiah leh a dangah te hralh chhunzawm leh Bye-Law, Amendment chungchang te an rel a ni.