Aizawl : Mizoram Finance Commission pahnihna (2nd Mizoram finance commission)-in an Chairman F. Vanlalruata hovin nimin khan Saitual district an tlawh a. Saitual district village council association hruaitute, Saitual-a VC tin aiawhte, District rural development agency-a Project Director, District Urban development officer leh District local administration officer te nen an inkawm.
2nd Mizoram Finance Commission lamin tualchhung sorkar (local self government) indin chhoh dan leh ram danpuiin thuneihna tam zawk a pek leh an sum chan tur State Finance commission kaltlanga ruahman chungchang te an sawifiah a. Commission hnathawh tura sorkarin a ruahman te sawifiahin, VC te hnena Central leh State sorkar atanga sum hlanchhawn dan leh hriattur tul dang te an sawifiah bawk.
Village Council ten an khua/veng hmasawnna leh inrelbawlna atana an hman thin village council fund tihpun zel a nih theih dan tur pawh an sawiho a. Mizoram finance commission pakhatna atanga VC ten grant an hmuh hmanga an hnathawh thenkhatte Commission member ten an endik bawk a ni.