- – K. Zothanpara
June 22 & 23, 2022 (Nilaini leh Ningani) zanah Mizoram UPC Kohhrana pastor pakhat leh Presbyterian Kohhrana kohhran upa pakhat chu Pathian thu hmangin an inhnial chiam mai a. Media-ah ‘live’ a ni nghe nghe a, entu pawh an thahnem viau niin a lang a, sawi zui pawh a hlawh viau mai. Pathian thu hmangin Pathian làwm záwng ni lo, Setana làwm záwng tak tihna ni dawna ka hriat avangin ka en ve lo a, an thil sawite pawh ka hre ve lo. Chuti chung chuan, an thil sawi ni loin, an inhnial chungchang han sawi ve a châkawm a, i’n pau dawn teh ang. Kohhrana rawngbawltu pawimawh takte pahnih inhnial chungchangah khan a lâwm ber chu Setana a nih ngei a rinawm.
Debate an nei dawn tih thâwm a awm tan tirh khan tha lo ka tih êm avang te, a inhnial turate kohhrana nihna pawimawh tak nei an nih avang te, kohhran páwl inkara innghirnghona chawk chhuaktu mai a nih dawn avang leh, Setana làwm záwng tak a nih avangin thulh ni thei se ka ti hle mai a. |hulhtir dan kawng a awm beiseiin kan kohhran (Presbyterian) hruaitu lúte sawipui ve hrim hrim ka tum rilru a, mahse, sawipui hmain ka lo theihnghilh leh hman; an inhnial dawn ní-ah ka hre chhuak leh chauh a, a tlai tawh si avangin ka sawi ta lo. Kan kohhran hruaitu lûte zinga ka nèl zual deuh mi pahnih/pathum chu message ka thawn hman thung.
Inhnialna âtthlâk
II Timothea 2:23-ah chuan, ‘Amaherawhchu, indonate a hring thin tih hriain, inhnialna âtthlâk leh fing lovahte chuan tel duh suh,’ tih kan hmu a.
Pathian thu hi inhnial chiam chiamna tur a ni lo a, zawm tur a ni. An inhnialna khan rah tha a chhuah tur te, kohhran leh mipuiin an hlâwkpuina turte ka hmu thiam pha lo a; hlâwkpui chu sawi loh, nghawng tha lo nei lian hle zawk tur thil a nih avangin Bible-in, inhnialna âtthlâk a tihte zinga mi a ni ngeiin a lang.
Inhnialte pahnih leh ngaithlatute zingah Pathian thua han lâwm zui phah viau emaw, Pathian thua lungawina leh hlimna te, Pathian thlarau thianghlim pàwl tharna han chan phah zui ta an awm ang em ka hre lo a. Ka hriat zui erawh chu – mipuiah pawh inhnialna a chawk chhuak thar leh, tih hi a ni. Chuvang chuan, kohhrana rawngbawltu pawimawh takte pahnih inhnialah khan a lâwm ber chu Setana a nih a rinawm viau a ni.
An inhmin lo
Inhnialna khan eng kawngah emaw chuan mi hriatna a belhchhah a ni thei a, mahse, Pathian rinna kawngah erawh chuan hlâwkna a thlen kher lo ang. Inhnialate kha an inhnial zawhah pawh an ni tún ang a, an lungawi tak tak chuang lo ang. An tâwt up up zual zawkte pawh a ni mai thei. Chutiang bawkin, ngaithlatute pawh an ni tih a lang reng mai.
An kohhran ve ve thurinah phei chuan an inhmin lo nasa hian a rinawm. An kohhran member-puite ve ve pawh an inhmin chuang lo bawk ang. Presbyterian kohhran mi \henkhat chuan UPC kohhran mite chu rinna dik tâwk loah an ngai a ni thei a, chutiang bawkin UPC kohhran mite pawhin Presbyterian kohhran mite chu rin dan dik tâwk loah an ngai ve thei tho bawk. Rin dan, kalphung leh tih dante chu pawl hrang nih tâkah chuan a inang lo ve bawk ang. Dika inngai ve ve an nih avangin dik loa inpuhna ve ve chu an pawm chuang dawn lo. Chuvang tak chuan, inhnialna âtthlâk tak a ni.
Inhnialnain a nghawng
Kohhrana rawngbawltute mahni kohhran tan a, an kohhran lo zawk sawisela inhnialna kha social media lamah sawi zui a hlawh hle mai a. Kohhran pawl hrang hrangte awmna group-ah chuan mahni awmna kohhran tan ru tak leh sawi mawi tum ru tak si, tan thlur mai nih hreh siin an han sawi zui vel a; nuih chu a za ru ang reng! Mahni kohhran mite chauh awmna group-ah pawh inhnialna chawk chhuaktu a ni tho bawk.
Mi pakhat chuan, “Khati taka Pathian kohhran ve ve an insawichhia kha ka rilru a na ngawih ngawih,” a ti a. Presbyterian kohhran mi nula pakhat chuan, “Inhnialna chawk chhuaktu PC Biaksiama hi ka haw ngawih ngawih,” a ti hial bawk a. An inhnial avang khan Pathian leh kohhran hmangaih tak taktute rilru a ná a, inhnialate kha an huat phah hial a nih chu. Presbyterian kohhran pa khan a awmna kohhran chhanin tang viau mah se, a Presbyterian pui zingah ngei pawh ngeitu leh hawtu tam tak an awm phah tlat zu nia!
Mizoram UPC Kohhran Pastor kha chuan an kohhran ai a awh a ni mai thei a, Presbyterian Kohhran pa erawh kha chuan an kohhran ai a awh lo. Chuti chung chuan, Presbyterian Kohhran leh UPC Kohhran inbeihna angin mi tam takin an ngai tho tho. II Timothea 2:23-a kan hmuh, “… indonate a hring thin tih hriain…” tih a nih angin, inhnialna âtthlâk leh fing lo tak khan kohhran leh kohhran mite innghirnghona, thua indona a hring chhuak ta tho a ni. Tisaa indona erawh hring chhuak lo hrâm se.
Inhnialna kha Pathian thu tak duhna leh inzirtir tumna vang a ni lo a; mahni kohhran sawi mawina leh kohhran dang sawi chhiatna mai a ni. Chuvang tak chuan, Pathian làwm záwng a ni thei lo; Setana làwm záwng a ni.
Ngaihtuah zui a tul em?
Kohhran hruaitute pawhin kohhran páwl dang sawichhiaa mipui vantlang hmaa inhnial chiam ang chi hi an ngaihtuah zui a tul viau lo maw? Kohhran leh kohhran mite kal dan leh awm zel dan tur atan thil tha a nih loh chuan hmalak zui a tha ang em? Khatianga inhnial chiam mai kha kohhran leh a neitu Pathian pawi sawinate a ni thei em? Kohhrana rawngbawlna pawimawh chelhtute an nih leh nghal phei chuan ûm zui deuh a tha lo maw? Inhnialnaa tel pakhat zawk phei kha chu kohhran pawi a khawih tawh avanga kohhran upa a nihna hlihsak lailâwk tawh, a a hnua kohhran upaa pawm leh tâk a nia sawite a awm nghe nghe a, en zui deuh chi a ni mai thei!
Tlipna
Ringtute hi kan awmna kohhran avanga kan tum van nuama kái tur kan ni em? Pathian kan rin a, a thu kan zawm a, a duh dana kan awm avang zawka vanram kai tur kan ni zawk lo em ni?
Presbyterian kohhranah kan awm emaw, Baptist kohhranah kan awm emaw, UPC-ah kan awm emaw, Roman Catholic-ah kan awm emaw a ni thei a; Pathian kan rin a, a thu kan zawm a, a duh dana kan awm phawt chuan vanram kan kái dawn lo’m ni (Pathian thu thu erawh a ni a). Vanramah chuan kohhran páwl hrang kan awm tawh hek lo ang.
Mizo Theological Association leh mi thahnemngai tak takte’n kohhran páwl hrangte inzawm khawm theihna tura beihpui an thlâk mek laia kohhran inrem lohna leh innghirnghona chawk chhuak záwnga thil tih a ni hi a pawi hle. Pathian thu hi inhnial nan hmang loin, zawm mai tum zawk ila, kan tha tlang ang. Kohhran dangte pawh an rin dan leh kalphungte kan pawm zawng a ni lo a nih pawhin, Pathian kohhran vek kan ni a, insawisel lo ila, inkher lo ila, innêk kher lo ila, i inzahsak tawn zawk ang u hmiang.
“Pathian chu buaina Pathian a ni lo va, remna Pathian a ni zawk si a, mi thianghlim kohhranho pawl zawng zawnga a awm ang hian.” (I Korinth 14:33)