Kan chhuahkate buaina hi inhmangaih tawn nan hmang ila
Kan buaina bul Silchar tuilian pawhin kam lam a pan zel a, tuialhthei leh bungraw dang phurte pawh an rawn chhuak chho leh tan zel ta bawk. Mangang leh chiaiin awm lo ila, kan hnam nunmawi leh chin dan tha zawm chunga nun i tum zel bawk teh ang u.
Tuialhthei a vang a, a nei deuhten lak zawh vek tum ang hrimin an bur neih ang ang tih khah vek an tum ni berin a lang a, a black-a zuar ho lahin a rate mumal pawh awm thei lo khawpin an hralh theihna sang lam apiang an lo chhiar ve bawk. Kan rinnate pawh hi a tiderthawng miah lo niin a lang thin a, kan khawsa zia hi a zia lo lam hret thin chu a ni.
Nitin mamawh a rawn lut khaihlak deuh a, kan stock sa pawh vawilehkhatah a rawn to nghal vek a, neihsate chu a man pangngaia zawrh theih zel tur niawm tak si kha a ni si lo. Kan chakkhai lakluhna kawnga harsatna a awm apianga hetiang kan khawsa ziah duh ta mai hi inenchian kan va ngai em.
Kan nun dan hi chhut fo ila, kan chhuahkate an lo buai deuh a nih pawhin cheng ho za hi chu inpeizawnin, inhmangaih tawn ila, kawng dang a awm zel dawn tih thlengin i hre teh ang u. Kawng dang kan ngahziate hi kan hriat thar a ngai. Chumi tur chuan kan rilru puthmang siamtha chungin, inhmangaih tawn i zir thar fo ang u.