India rama politician-in Prophet Mohammed-a a sawihnawmna avanga thil thleng zelah Rajasthan-ah Muslim pahnihin Hindu pa lu an tansak a, a titute hi Pakistan-a pawl nen inzawmna nei nia hriat an ni.
Hmar lam state-ah hian boruak a la tang hle a, Chief Minister Ashok Gehlot chuan mipuite chu boruak sosang zawnga awm lo tur leh tualthattute pawh a na thei ang bera hrem an nih tur thu a sawi.
Thah tak hi puanthui, Kanhaiya Lal-a a ni a, Udaipur district-ah Thawhlehni khan pa pahnih hian thatin an che lai chu a video an la a, online-in an thehdarh zui.
Hetianga an chet chhan hi politician pakhatin Prophet a sawihnawmna tan zawnga a awm vang niin an sawi bawk.
National Investigative Agency chuan he thil hi an chhui zui nghal a. Police officer pakhat chuan a tuitute hi Pakistan-a pawl pakhat nen inzawmna an nei tih finfiahna an neih thu thuthar lakhawmtute hnenah a sawi.
Islamabad erawh chuan he thu hi a pha nghal a, ‘thil awihawm loh lutuk’ niin a sawi.
Tualthahna thleng avang hian Udaipur-ah chuan khawlai a rehin sakhuana thil avanga buaina a chhuah hlauvin mipuite chu an tawm vek a ni.
Khawpui chhungah police tam tak dah niin officer-ten buaina siam lo turin an ngen reng bawk.
Curfew puan a ni a, mi tam tak chu an inrinlawk loh avangin ni tin mamawh pawh an nei lo hlawm.
“Ni tin inhlawhfate hi a tuartu ber kan ni,” tiin pa pakhat, Mukesh Gardiya chuan a sawi a. “Hetiang a thleng thut hian min barakhaih hle a ni,” a ti.
Sorkar chuan internet service titawpin punkhawm a khap bawk a. Police chuan tualthahna video-a lang mipa pahnih an man tawh.
Video dangah chuan Prime Minister Narendra Modi pawh an vauna a lang a. Rajasthan police hotupa chuan chanchinbute chu a video a rapthlak em avangin thehdarh lo turin a ngen.
Mipa pahnihte hi Lal-a dawrah hian dawrtu pangngai angin an lut a, a teh kual vel laiin an bei ta thut a ni.
Lal-a hian a hmain social media-ah BJP thupuangtu thin, Nupur Sharma-i’n thla hmasaa Prophet a sawi dan a thlawp thu a lo tar lang tawh nia sawi a ni.
Sharma-i’n TV-a thil sawihonaa Prophet a sawi dan hi Islam ram tam takin demin an haw hle a. BJP pawhin an party-a a nihna atangin an chawlhtir zui nghal.
India ram hmun hrang hrangah a thu sawi duh lohna lantur niin tharum thawhna pawh a thleng nual bawk.
Lal-a hi thah a nih hma chawlhkar thum liam taah khan sakhaw thila a ngaihdan avangin police-in an lo man tawh niin Indian Express chanchinbu chuan a tar lang a. Chhuah a nih hnuah pawh a nunna atan a hlauhawm avangin police venhimna a dil nia tar lan a ni.
Police hian Hindu leh Muslim thenkhat kovin a kawm a, Lal-a pawh zalenin a awm zui niin police thuneitu pakhat chuan chanchinbu hi a hrilh.
Tualthahna thleng hi India-a politician langsar tak takte chuan an dem thu an sawi hlawm.
Rajasthan chief minister hlui, BJP hruaitu, Vasundhara Raje-i chuan Gehlot-a kaihhruai Congress sorkar hnuaiah an state-ah sakhua leh chi thila buaina a pung niin a sawi.
BJP hruaitu thenkhat chuan tualthah duh lohna lantir nan Delhi-ah kawng an zawh dawn tih an sawi.
Congress hruaitu, Rahul Gandhi pawhin tualthahna thlengin a barakhaih thu sawiin a titute chu a rang thei ang bera hrem a phut.
Muslim pawl langsar tak takte pawhin an dem a. All India Muslim Personal Law Board chuan India dan leh Islam lehkhabua nun dan inziak kalha chetna a nih thu an sawi.