India rama state hausa ber, Maharashtra-a sorkar chiri tak chu a fel dawn ta niin a lang a. A MLA tam zawkin an helsan hnuah chief minister chu bâng sorkar thar a ding dawn ta.
Shiv Sena chief Uddhav Thackeray-a chu an party hruaitu tho, helnaa hruaitu, Eknath Shinde chuan a thlak dawn a, Ningani zan khan lak luh a ni.
Thackeray-a hi a Shinde-a hova a MLA tam zawkin an helsan avangin a tanrualpuite nena an din tangrual sorkar chu a ding tlang zo ta lo va, helnaa hruaitu Sena MLA hlun hi BJP nena tangho sorkarah deputy chief minister a ni zui ang.
BJP hruaitu, Devendra Fadnavis leh Shinde hian Ningani tlai khan Governor Bhagat Singh Koshyari-a an hmuin sorkarna an siam theih thu an thlen dawn nia sawi a ni a, he chanchin ziah lai hian engnge thleng zui hriat hman a ni lo.
Fadnavis hi a tirah chuan chief minister niin Shinde hi a deputy tur anga sawi rik a ni a; mahse, a hnu lawkah BJP hruaitu hian sorkara a tel ve dawn loh thu a sawi a ni.
“Tha taka sorkar a kal theih nan ka tel ve dawn lo,” tiin Ningani zan dar 7:30-ah Shinde hi lak luh a nih tur thu leh minister dang lak luh an awm rih dawn lo tih a sawi bawk.
Fadnavis-a hi kum hnih liam ta khan chief minister atan lak luh a lo ni tawh a; mahse, ni li chiah a sorkar a ding hman tihin BJP leh Sena ten thuneihna insem danah inremna an neih theih loh avangin a a tlu lehnghal.
Thackeray-a hi Ningania a sorkarin rintawk a hlawh leh hlawh loh buk turin larsapin a ti a, hei hi an party chuan Supreme Court-ah khing mah se court hian Nilaini zan khan sorkar bukna kaltlangpui turin thu a titlu a, a hnu lawkah Maharashtra chief minister a nihna atang hian a bâng zui ta a ni.
Sena chief hi a MLA tam zawkin Shinde-a hova an helsan hnuah MLA 13 chauh thlawptu a nei tawh a. A MLA helte hi BJP rorelna state pathumah an tlan kual hman a. Mumbai atangin Gujarat-a Surat khawpui an pan hnuah Assam khawpui, Guwahati-ah an thlawk lut leh a. Nilaini zan khan Ningania sorkar buknaa tel tuma inchhawp hnaiin Goa an pan leh a ni.
Sena hel lama an thupuangtu, Deepak Kesarkar chuan hetianga an chet chhan hi kalphung leh ngaihdan vang a nih thu a sawi a, thuneihna leh chanvo sang zawk um vanga tih an nih loh thu a sawi a. An party chuan an thuthlung an zawmtu BJP nena thawhho an duh vang niin a sawi.
Thackeray-a chu an haw lo va, an hmangaihin an zah em em reng tih a sawi a. “Shiv Sena-a tute mahin Thackeray chhungkua hi an dodal lo,” a ti.
“Chanvo tha duh vanga hel anga min sawi hi thu belchian dawl lo a ni a. Tun thlengin eng thutlukna mah siam pawh a la awm lo,” tiin Kesarkar chuan a sawi a. BJP nen sorkar siam tur erawh chuan an indawr tan thu a sawi bawk.
Hel lam chu Sena an nih tawh zawk thu leh Thackeray-a lamtangte chu a tê zawk an nih tawh thu a sawi a. “Tunge Shiv Sena dik tak zawk tihah zawhna engmah a awm tawh lo. Dan angin kan tam zawk a, kei hi legislature party zawk kan ni,” a ti.
MLA helte an venhimna leh an lo duhsakna hmuh tur awm mah se BJP chuan Sena chhungkuaa buaina awmah inrawlhna an nei lo tih an sawi.
Hetih lai hian Fadnavis-a hian an party hotu liante chu helna a chhuah chhung khan vawi hnih a be hman a. A vawi thumnaah phei chuan Shinde chu Guwahati atangin Vadodara-ah Fadnavis leh Union Home Minister Amit Shah te nena inkawm turin a kal a ni.