Thackeray-a chu Nilaini zan khan an state politics chiri tak karah chief minister atang a bâng ta.
Larsapin a sorkarin rintawk a hlawh leh hlawh loh chu Ningania an state assembly thutkhawmah buk tura tiin hei hi Supreme Court-ah buk lo turin khing mah se a hneh tak loh avangin a bâng.
A MLA tam zawkin an ring lo va, an thawhpui pahnih, Nationalist Congress Party (NCP) leh Congress MLA te nen ngawt chuan an tling zo dawn chuang lo a ni.
Sena MLA helte chu Thackeray-a a bân hnuah an inkulhna atanga hawin an duh dan an sawi ang ngeiin BJP nen an thawkho dawn ta a. Party pahnih hi kum 30 chuang thawkho tawh niin kum 2019 inthlan hnuah khan chief minister tur zawk inchuhna avangin an inthen.
Sena hi BJP ang bawka Hindu nationalist ni mah se centrist party an tih pahnih a thawhpui zui ta a ni.
India rama regional party lian ber hmalam hi a chiang ta lo hle.
Sena hi kum 1966-a Thackeray-a pa, Bal Thackeray-a din a ni.
An party chhunga helna hi thil thar a ni lo va; mahse, tun tuma mi erawh a dang ta deuh niin politics hre deuhte chuan an sawi a, an party ralna tur a ni thei mai ang em tih zawhna an nei.
Political analyst Suhas Palshikar chuan ‘Shiv Sena tlakhniam intanna’ tiin a sawi.
An party MP hui, Bharat Kumar Raut pawhin hetiang ngaihdan bawk hi a nei.
“Tun hmain tun anga buaina hi a tawng ngai lo. A bulthum atanga thlawptu leh worker-ten party hi an kalsan mek,” a ti a. “Thackeray chhungkua leh party-in tun hma a pa lo,” a ti.
India-ah hian regional party an tihte hi an pawimawh hle a, Sena angte phei chu huhang ngah tak niin state inthlanah phei chuan national party an hneh zawk fo va. Ram pum huap inthlanah pawh national party-in a mala sorkarna an siam zawh loh changa sorkartirtu ber an ni thei.
Sena dintu, Bal Thackeray-a kha chanchin ngah a ni a; kum 1960 chho vela Kerala leh chhim lam state dang atanga hnam dang pem lut ruih ruih kara Maharashtra-a cheng, Marathi-te dikna chanvo humhalhna kawnga bei nasa leh thawhhlawk ber zinga mi a ni.
A thu sawi dan danglam leh hriam tak tak avangin India rama politician sawi hlawh ber pawl a ni a. India-a sumdawnna khawpui, Mumbai-ah pawh a thupek khirh tak tak avangin a hun laiin duh lohna lian tak tak lantir a lo ni tawh thin.
Kum 1992-93 chhova Mumbai-a buaina (riot) chhuakah pawh sorkar atanga chhuitute chuan Sena member leh party hruaitu eng emaw zatin Muslim beihna an thlen niin an sawi a; mahse, Bal Thackeray-a hi thiam loh chantir a ni lo thung.
Tun tum helna an tawh hian district leh khaw level-a an party a nghawng dan hriat mai theih a la ni lo.
Solapur district-a an party chief Gurushant Dhuttagaonkar chuan district leh khaw eng emaw zatah worker tam takin helho an thlawp zawk niin a sawi.
Thackeray-a tana rinawm tluan MLA, Rahul Patil erawh chuan Sena chu thuthlunga innghat a nih avangin a zawmtu rilru sawi danglam theih a ni lo niin a sawi a. “Bala Saheb (Bal Thackeray)-a fate kan ni a, kan thih thlengin kan rinawm ang,” a ti.
Dhuttagaonkar pawhin tha zawka an thawhleh a rin thu sawiin BJP nena an thawkho leh thei chu a lawm thu a sawi a. A rei dawn em a hre lo va, Sena tan chona lian ber a nih thu a sawi.
Patil-a chuan mipuiin helho chu inthlan lehah an hrem dawn tih a sawi a. “An thinrim a, zirtirna an pe ang,” a ti.
Mi thenkhat chuan Sena hi Thackeray chhungkua nen inzawm tlat a ni a, hei hian an thawhlehnaah a puih an ring.
Palshikar Thackeray chhungkaw tel lovin Sena a awm thei lo niin a sawi a. Thackeray leh a fapa, Aaditya Thackeray te chu Bal Thackeray-a hnungzuitu an ni.
Bal Thackeray-a thurochun vangin an party chu a ding leh dawn niin an ngai.