India sorkar leh MNF ten inremna thuthlung, Memorundum of settlement (MoS) an ziah ni, Remna Ni champha vawi 36-na chu nimin khan Mizoram hmun hrang hrangah lawm a ni.
Aizawlah chuan Mizoram sorkar buatsaihin Vanapa Hall-ah hman a ni a, he huna khuallian, Chief Minister Zoramthanga chuan inremna thuthlung chu India sorkar duh ang taka siam a ni lo a, Mizoram mipui duh dan ang tak pawh a ni lo a, ramhnuai sorkar duh ang taka duan pawh a ni lo tih sawiin, “Pathianin kan vaia pawm tlan theih inremna min pek a ni,” a ti.
Zorama chuan he inremnaah hian Mizoram chu a bika venhimna pek a nih thu a sawi a, sorkar laipuia hotu lian faten emaw an duh duhin ram an lei thei lo a, chutiangin thil dangah pawh venhim bik a nih thu leh hei hian inremna thuthlung a ropuizia a tilang tih a sawi.
Inremna nei turin India sorkar leh MNF-in a man pek ve ve an nei tih a sawi a, “State min pek an tiam angin min pe a, ram buai laia thubuai kan awrh zawng zawngte min hlihsak,” a ti a, chutiangin MNF pawhin inremna atan pek ve an neih thu a sawi a, Article 371G hnuaia a bika venhimna Mizoram an pek hi thiah mai mai theih a ni lo tih a sawi.
Chief minister chuan Zoram remna hi state dang leh ram dang mite pawhin an awh thu sawiin, “Thenawm state-ahte pawh inremna thuthlung ziah hriat tur a awm thin mah se harsatna an tawk zui leh thin a, Mizoramah chuan inremna ziah hnuah Zoram buai siamtu an awm tawh lo,” a ti.
Mizoram hian khawl thilsiam lian tak tak thawn chhuah tur nei lo mah se, export tur a neih chu remna a neih ang hi a nih thu a sawi a, “A hmanna tur dik takah hmangin, remna siamtuah Zoram mipuite hi tanga remna hna thawktu kan nih a tha a, chu chu Pathianin remna min siamsak chhan pawh a ni ngei ang,” tiin a sawi bawk.
Remna Ni vawi 36-na lawmna hun hi chief secretary hna chelh mektu, Navin Kumar Choudhary chuan kaihruaiin remna leh muanna atana nunna chân tate zahna lantirna hun hman niin, Remna Ni documentary thlirho a ni bawk a. NGO Coordination Committee Member, Central YMA Vice President Lalhmachhuana leh MKHC Chairman Rev. Dr. Vanlalnghaka Ralte ten thu an sawi bawk a ni.