Aizawl: Nilaini tlai khan Mizoram MP K.Vanlalvena chuan NHIDCL Managing Director Chandal Kumar leh general nanager, technical changtu, Ashok Kumar Jha te chu an office chamber, Delhi-ah a kawm.
Vena chuan Mizoram hmun hrang hrangah thlur eng emaw zat NHIDCL-in double lane kawng an laih mek chu Mizoram hmasawnna leh Act East Policy atana tangkai tur a nih avangin NHIDCL hotute chungah lawmthu a sawi a. Hetih rual hian Mizoram hmun hrang hranga contractor leh sub-contractor-ten an hnathawh work order-in a phut anga hna thawk lova an tana awlsam tur ringawt ngaihtuaha leivung an paih chu dan kalh a nih thu te, Mizoram chhunga forest leh environment te tihchhiat a nih nasat thu te, mi tam takte thlai chinna leh lui te a tihchhiat nasat thu a thlen.
Mizoram chhunga double lane laih mek heng Seling to Tuipang te, Zemabawk to Champhai te, Lunglei to Tlabung te hi Mizoram sorkar enkawlna hnuaia dah lova NHIDCL hnuaia hnate hi thawh an nih avangin uluk zawka enkawl turin MP chuan NHIDCL hotute hi a ngen.
Heng contractorte hi a rang thei ang bera control an tul thu leh a tul dan anga action lak a tul thu NHIDCL hotute hnenah hian a thlen nghal a ni.
NHIDCL hnuaia kawng laih leivung paihin ram a tihchhiatte thlalak leh video te Vena chuan NHIDCL hotute hi a hlan nghal bawk a ni.
K.Vanlalvena chuan nikum October thlaa Minister, Road Transport changtu Nitin Gadkari hnena a thlen tawh Mizoram chhim tawp kawng pui laih tur, Mara Autonomous District chhunga Kawlchaw to Lawngmasu emaw, Tuipang to Lawngmasu double lane road lai tura ngenna a lo thlen tawh chungchang a bawhzui nghal bawk.