French champion Paris St-Germain chuan Euro maktaduai 40 in FC Porto atangin midfielder Vitinha an lalut fel.
Kum 22 mi hian Paris-ah hian kum nga daih contract a ziak a, Parc des Princes a star player rual zingah a inkhel tawh dawn.
FC Porto chherchhuah midfielder hian kum 2020-21 season kha loan in Wolverhampton Wanderers hnenah a hmang a, an tan vawi 22 a inkhel. Nimahsela Molineux Stadium-ah a chetthat tawk loh avangin Wolves in an lei nghet ta lo.
Porto a a kir leh hnuah season liamta khan vawi 47 a inkhel a, Sergio Conceicao-a 4-4-2 ah a lai luahtu pawimawh niin ball semtu berah a tang thin a. Goal li khungin midang goal khung tur vawi thum a siaksak tel bawk.
Porto tana a khelh tan avangin kumin March thla khan ram tana khel tura ko a nih hnuah a vawikhat nan a inkhel a. World Cup qualification play-off-ah North Macedonia a hmachhawn.