Lashkar-e-Taiba (LeT) firfiak pawla mi ni ngeia hriat mi panga chu Ningani khan Jammu & Kashmir-a Srinagar leh Sopore-ah an ralthuam leh thil dangte nen an man.
Police chuan Srinagar-ah mi pahnih manin mi firfiakte hnena khawthleng leh ralthuam kawhhmuhtu niin an hria a. Mi firfiakte ngei pawh kalna tur hrilhtu niin an sawi.
Mi dang pathum hi hmun khata an manna atanga km 50 vela hla, Sopore-a man niin mi firfiak ang taka chhal tur ni chiah lo mah se firfiaka chetna tur remchang an dap niin an sawi.
Srinagar-a mi mante hi police leh Rashtriya Rifles miten Sanat Nagar Chowk-Rangreth road-a special checkpost an siama man an ni a. Pakhat zawk hi security agency-te chuan hybrid terrorist tia sawiin pistol nena an dapnaah an man chhuak a ni.
Hybrid terrorist an tihte hi venhim hna thawktuten an sawi dan niin firfiaka chetnaa inhnamhnawih tak tak ni lo; mahse, mi dangte chetna tur lo dappuia kawng lo kawhhmuhtu an ni.
Thu an zawh fiahna atanga an hriat atangin Pampore-ah beihpui thlak zuiin hybrid terrorist dang pakhat chu pistol pathum nen an man tih police thupuangtu chuan a sawi.
Police chuan Naveed Shafi Wani, Shar Shali Khrew Pampore leh Faizan Rashid Teli, Kadlabal Pampore an nih thu a sawi a. An pahnih hi mi firfiak, ralthuam leh puak thei dangte keng kualin in district Srinagar district-a an chet dan tur a enpui niin thupuangtu chuan a sawi.
Police chuan pistol magazine paruk, a mu, grenade leh gelatin stick, wire leh a dehpuahna pariat an man tel tih a sawi.
Sopore-ah ve thung hian Takyabal Krankshivan-a police, Rashtriya Rifles leh CRPF ten security check post an siamah mi pathum an man tih police chuan an sawi a. Man an nih hma hian tlanchhiat an tum hmasa nghe nghe a ni.
“An dapnaah AK 47 rifle pakhat, pistol pahnih, magazine pahnih, pistol mi 10 leh hand grenade pakhat hmuh tel a ni,” tiin police thupuangtu chuan a sawi.
Heng mi pathumte hi Amargarh-a cheng Rahid Mushtaq leh Amir Shafqat Mir leh Baag-e-Rehmat, Sopore-a cheng Tahir Nisar Sheikh te an ni.
Tuna hriat theih chinah chuan LeT hnuaia che niin chetna tur remchang dap an ni tih an sawi bawk.