Canada ramah hmanlai sikul thin hmunah naupang ruang tam tak hmuh chhuah a nih mek laiin Nilaini khan a sikul dangah kum sarih leh 15 inkar thlan chhinchhiah mumal loh 182 an hmu chhuak leh.
Mi thiamten leihnuai thlithlaina radar hmangin Cranbrook, British Columbia-a St Eugene British Columbia School hluiah naupang ruang thahnem tak hi an tih Lower Kootenay Band chuan a puang.
Kumin May thla khan British Columbia-a Kamloops Indian Residential School hluiah thlan chhinchhiah loh 215 hmuh chhuah a ni a. Kar hmasa lawk khan Saskatchewan-ah thlan 751 dang hmuh a ni tawh bawk.
Lower Kootenay Band tar lan danin tuna ruang an hmuh chhuahna, Catholic School hi kum 1912 leh 1970 inkar khan sorkar kalpuina hnuaiah hawn a ni a, nikum khan a dap chhuah hna hi an thawk tan a ni.
Thlan thenkhat hi thuk lo tetea laih an ni a, feet 3 leh 4 leka thuka phum pawh an awm.
Hmuh chhuah tharte hi Ktunaxa hnam an nih an ring a, Lower Kootenay khua leh thenawm hnaia cheng an nih an ring.
Kum 1990 thleng khan Indian, Inuit leh Metis naupang 1,50,000 chuang chu tuna ruang an hmuh chhuahna ang residential school hrang hrang 139-ah hian tihluihna hmanga luh luihtir an ni a. He hmunah hian headmaster leh zirtirtuten diriam taka enkawlin an hnam kalphung zawm an khapsak bur thin a. Nasa taka nghaisain, mipat hmeichhiatna lamah pawh an khawih buai nasa thin hle.