India court sang ber chuan rorel lai party thupuangtu thin, tun hnaia Prophet Muhammad-a a sawi dan avanga inhnialna nasa tak siamtu chu a khak.
Court chuan Nupur Sharma-i ‘tawng thlahdah chuan ram pumah boruak tang tak a siam’ niin a sawi.
TV-a thil sawihona pakhata Sharma-i thu sawi hi ram chhung hmun tam takah duh lohna lantir a ni a, Islam ram tam takin India an dem bawk.
Court chuan TV channel-ah inlan leha ngaihdam dil turin a ti.
Sharma-i hian court-ah hian ram chhung hmun hrang hranga a thil sawi avanga thil thleng nia sawite a chhan chiang zawk chhui tura ngenna (petition) a thehluh ngaihtuah judge chuan a khak let a ni.
Court chuan a dilna hi hnawlsakin ‘a dilna hian a chapona a tilang a, ram chhunga magistrate-te hi atan chuan an tê lua a ni’ tiin a sawi.
A dan hre mi chuan court-ah hian ngaihdam a dil thu leh a thil sawi pawh a hnuh kir thu a sawi.
Judge chuan a thu sawi a hnuh kir hun chu a tlai tawh lutuk niin an sawi a, “A thil sawiin mi a tihnat hnuah chauh a hnuk kir a ni,” an ti.
Court hian party thupuangtu chu mi dang tina thei thu sawi turin phalna (license) pek a nih loh thu a sawi bawk.
Tar lan tawh thin angin Sharma-i hi Prophet chungchang a sawi lai hian India-a rorel lai, BJP thupuangtu a ni.
Islamic ram tam tak - UAE, Saudi Arabia, Qatar leh Iran te pawh telin, India demna thu sawia an rama India palaite hnenah pawh an duh lohna an lantir hnuah BJP pawhin an party-a an nihna atangin an chawlhtir zui.
Thil thleng hian India leh heng ramte inkara inthian thatna awm mek leh awm zel tur pawh a tihchhiat phah a ni.
Court chuan ‘Sharma-i thu sawiin Udaipur-a thil vanduaithlak tak thlenna bul pawh a ni’ tiin a sawi.
Hmar lama Rajasthan khawpui pakhatah hian Muslim pa pahnihin Hindu pa, puanthui an that a. An chet dan hi video lain online-ah an thehdarh a. Kanhaiya Lal-a hian social media-ah Sharma-i a thlawp tih a sawi avanga phuba lak nan an that ta niin an insawi.