Manipur-a farm hrang hrangah vawk thahnem tak an thi a, state sorkar chuan African Swine Fever a nei thei em tih an en fiah nghal mek.
Vawk vulhtute chuan hetianga an ran a thih puk puk chhan hi African Swine Fever a nih ngei an ring a. He hri hi hmarchhak hmun hrang hrangah a leng.
Vawk vulhtute hian veterinary department chu he thil chhui chianga hma la turin an duh tih an sawi a. State sorkar chu state dang leh ram pawn, a bikin Nagaland, Assam, Meghalaya leh Myanmar atanga lak luh khap turin an duh bawk.
Progressive Farmer Association chuan department thuneituten farm thenkhat chu an tlawh tawh tih an sawi a; mahse, thil tih tul leh pawimawh, hmalakna tak tak chu an la nei lo niin an sawi.
Hetih lai hian veterinary department chuan vawk vulhtute chu an vawkte anmahni farm theuhva invenna pe tha turin an ngen ve mek bawk.
African Swine Fever hian Assam-a vawk vulh tam tak a tihlum tawh a. Vawk 17,000 zet an thi a, a hnuah an thenawm, Arunachal Pradesh-ah vawk 4,500 a thi leh bawk.
Assam state sorkar pawh hian sorkar laipuiin Punjab leh Haryana atanga hmarchhaka a thawn luh thin chu an duh lo tih an lo thlen tawh nghe nghe.