Chief minister Zoramthanga’n Right to Information (RTI) Act chu thudik hai lanna hmanrua a nih thu sawiin, “Thil dik lo kan tar lan hian kan vaiin kan fimkhur phah,” a ti.
RTI Act hmanga mipuiten an hriat duhte online hmanga awlsam zawka an zawh theihna tur, Mizoram RTI online chu nimin khan chief minister hian a tlangzarh a, thil dik lo tar lanin mi a tihfimkhur phah a, thil tih dik lo tih mi tinin an tim phah tih a sawi.
Zorama chuan RTI chu sorkara thil hriat duhte hriat nan a tangkai a, thu dik hai lanna hmanrua a nih tur thu sawiin, “Chutihrual RTI chu a tha lo lama hman a fuh lo a, mi tihmualphona tura tih a ni lo a, ram tan, khawtlang tana tangkaia hman tur a ni,” a ti.
Mizoram RTI online chu mipuiin an hman tangkai ngei a beisei tih a sawi a, thingtlang hmun kilkhawr zawk atang pawhin awlsam takin sorkar hmalakna an hriat duhte chu awmhmun atangin an dil thei tawh dawn tih a sawi.
Chief minister chuan khawvel thiamnain hma a sawn nasain, a bik takin technology lama hmasawnna chuan khawvel pum deng chhuakin ram lian ber leh ram tê berte pawh hnai takah a inthlunzawm tawh tih a sawi a, chu hmasawnna chu tangkaia hman thiama nun a lo awlsam mai bakah mi mal leh khawtlang nunin hma a sawn theihna tura hman thiam a tha tih a sawi.
Mizoram RTI Online tlangzarhna inkhawmah hian Chief Information Commissioner Lalnunmawia Chuaungo chuan inlawmna thu sawiin, Chief Informatics Officer Dr. Lalthlamuana’n technical report pein, Information Commissioner Zorammawia’n lawmthu sawina hun a hmang.
Nimina tlangzarh tak Mizoram RTI Online software hi Mizoram State e-Governance Society-in a thlawna an siam a ni a, ISO certified a ni a. RTI Online hi website (rti.mizoram.gov.in/)-ah kalin emaw, mobile phone app Playstore leh App Store atangin Android leh Apple device hmangtute tan a download-a hman theih a ni.