Aizawl: Thenzawl khua chuan an khaw chhung hmun hrang hrangah Single Use Plastic (SUP) hman that lohna leh khap a nih inzirtirna bakah faina beihpui thlakin an hnatlang.
Thenzawl Town Sanitation task Force Chairman, SDO (Civil) ni bawk Beitlotha Nohro hoa meeting in an rel tawh angin, nimin atang khan Thenzawlah pawh India ram puma Single Use Plastic (SUP) hman leh zawrh khapna chu kalpui a ni a. Hemi denchhen hian nimin nilengin Thenzawl khaw chhunga VC Area hrang hrang, sorkar pisa leh zirna inah te plastic vawi khat hman daih that lohna inzirtirna leh faina beihpui thlakin, vantlang hmun pawimawh laite tifaiin an hnatlang.
Integrated Ayush Hospital-ah chuan thawktuten SUP that lohna inzirtirna power point presentation hmangin neih a ni a, Thenzawl Higher Secondary School zirlai NSS Volunteer-te chuan Vantawng khawhthla panna leh a enna hmunte an thian fai bawk.