Nimin zing dar 10:30 bawr vel khan Kulikawn, Ngaizel chhak atanga lung tam tham tak tlain hun rei tak chhung lirthei kaltlang theih lohin kawng a hnawh ping a, lung tla hian mihring delh a nei lo.
Thudawn danin, Ngaizel kham ko atanga lung tla hi atam a, hun rei tak chhung chu lirthei eng chi mah kaltlang theih a ni lo a, lung tla hian mihring delh leh bungraw lian tham delh chhiat neilo mahse kawng sira mihring kalna vawn ban erawh, a delh chhe nual thung.
PWD Road, South Division ten lung tla then fai hna hi an thawk nghal a, hnathawktute chuan kham koah hian lung lian la tla mai theite pawh a awm niin an sawi a ni.