Maharashtra-a sorkar buai tak chu chin fel thawkhat a nih hnuah Thawhtanni hian assembly-ah Chief Minister Eknath Shinde-a sorkar chu buk a ni dawn a. Pathianni khan assembly speaker thlannaah hnehna a chang phawt.
Shinde-a kaihhruai Shiv Sena thawhpui, BJP MLA Rahul Narwekar chu hneh takin Maharashtra assembly speaker atan hian thlan a ni a. Vote 164 a hmuh laiin Uddhav Thackeray-a kaihhruai zawk Sena MLA Rajan Salvi chuan vote 107 chauh a hmu a ni.
Speaker tur thlanaah hian MLA pathum - Samajwadi Party atangin Abu Azmi leh Raees Shaikh leh AIMIM MLA Shah Farukh Anwar te chu an hai thung.
Speaker tur thlan a nih hma hian Sena-a pawl hrang, Thackeray-a kaihhruai leh Shinde-a kaihhruaite chuan an MLA-te ve ve chu anmahni zawk candidate vote ngei turin an ti lawk a ni.
Maharashtra-ah hian assembly speaker hmun hi February, 2021 atang khan a ruak sa a. Thackeray-a kaihhruai sorkara tel zinga mi, Congress MLA Nana Patole chu an party state unit president a nih tak avangin a nihna a kalsan a. Deputy Speaker Narhari Zirwal chuan speaker angin a ai a awh a ni.
Tun tum speaker thlan hi tun hnai lawka an state-a politics buai tak a awm avangin ngaihven a hlawhin inpawhna pawh a na hle nia sawi a ni.
Dan lama mi thiamte chuan speaker thar hian thla hmasaa Deputy Speaker Zirwal-a’n Shinde-a lam\ang Sena MLA 16-te an nihna hnawl a tumna chu a paih rin a ni a. MLA nihna hnawlsak tum zingah hian chief minister thar, Shinde ngei pawh hi a tel a ni.
Speaker thar, Narwekar-a hian Shinde-a kaihhruai zawk hi Sena ‘dik tak zawk’ tia a sawi a nih chuan political party dang nena an inzawm kher pawh a ngai dawn lo niin mi thiamte chuan an sawi a. Shinde-a hian Sena Legislature Party leader nia inchhalin an MLA zinga hmun thuma thena hmun hnihin an thlawp niin a inchhal.
Shinde-a sorkar hi Thawhtanni hian buk a ni dawn a. Inrinni khan Sena MLA 39 bakah party dang MLA eng emaw zat, an vaiin 50-te chu Goa atangin Mumbai khawpuiah a luhpui tawh a. Vaukam state-a an awm hran hma hian hun eng emaw chen Assam-a khualbuk changkangah helin an lo inkulh tawh bawk.
Ningani zan khan chief minister atan lak luh a ni a, BJP hruaitu, Devendra Fadnavis chu a thachhangdawltu atan lak luh a ni bawk.
Zirtawpni khan Sena chief Thackeray chuan Shinde hi party do zawnga a chet avangin an party atangin a paih a. A lamtangte erawh chuan he Sena dik tak ni tawh zawka an inchhal angin he thutlukna hi nasa takin an dodal.