Mizoram Legislative Assembly Speaker Lalrinliana Sailo chuan National Highways & Infrastructure Development Corporation Limited (NHIDCL)-in Lawngtlai leh Thingfal inkara national highway laih zau hna thawh mek a tlawh a. Hna thawh lai meka duhthusam lo lai awmte a rang lama siam that hna thawk turin project manager a hrilh.
Speaker chuan national highway zauh hna thawh mek chu Mizoram mai bakah India ram tan pawha kawngpui tangkai a nih dawn avangin a tha thei ang bera thawh a pawimawh tih a sawi a. Hna thawktute chu neitu rilru pua thahnem ngai taka thawk turin a chah.
Kawng kual leh awih dan te, tuiluankawr ruahman dan leh hna hrang hrangah a bulthut atanga uluk taka thawh a pawimawh thu te, kawng thlang lama lung rem thenkhat duhthusam lo lai leh kawngpui sir thlang lam tlang khi thenkhat siam that ngai laite leh hna thawh fuh tawk loa a hriat laite chu hna viltute hnenah a thlen bawk.
Speaker hi Lai Autonomous District Council-a Executive Member C. Hrangthianga leh MNF District Headquarters Lawngtlai hruaitu thenkhatten an tawiawm a ni.