Film siamtu hriathlawh Leena Manimkalai chu documentary film thar, ‘Kaali’ tihchhuah tura poster-ah Hindu pathiannuin cigarette a zu lai leh LGBTQ flag a keng lai tihlan a nih vangin nasa taka beih a ni mek.
He poster hian Hindu sakhaw betute thin a khei na hle a, court hian inrawlhin la thla thuai tura hriattir ni mah se, Lenna chuan a thih thlengin a dinna ngaiha a ding reng ang, tiin a chhang.
Social media-ah chuk rawn hlawh mek a nihnaah ‘Lenna man rawh u’ tihte chu a riring malh malh hle a, Hindu sakhaw betute rilru a tina hle ah ngaiin, Delhi Police director hnenah thubuai hial thehluh a ni bawk.
Toronto khawpuia inkhuar mek Lenna chuan a thil tihah inchhirna a neih loh mai bakah a nunna in tawrh lo ngai ta pawh ni se, nunna hlan hial thlenga a inpeih thu in a chhanglet.
“Hloh leh tur chuang ka nei tawh lo. Ka la dam ve zel a nih chuan hlauhna tel miah lovin ka ngaihdan leh pawmdan ah ‘aw’ ka chhuahzel ang. Ka nunna in tuar dawn pawh ni se, ka tuar mai a ni ang chu,” a ti.
Nikum khan Prime Video-ah political saga film, ‘Tandav’ pawhin kil hrang hrang atanga beih a lo tawk tawh a, Lord Shiva tarlan a nih danah lungawi lohna nasa hle. Hei vang hian Prime Video pawhin Lord Shiva lanna hi paih in, thu delhkilh awm lovin ngaihdam dilna a tarlang nghal bawk.