Australia-a an khawpui lian ber chu kumina a vawi thum nan tui lianin nasa takin a tibuai leh ta a, mi 50,000 chuang zet an chenna in chhuahsana hmun him danga insaseng tura tih an ni.
Sydney khawpui hmun thenkhat chuan thla riat chuang chhunga an ruahtui dawn zat aia tam mah ni li lek chhungin an dawng a ni.
Kawngpui a hman theih loh va, in tam tak tui hnuaiah awmin mi sang tam takin power an nei lo bawk.
Sik leh sa inthlak vel dan chi khat, La Niña an tih avanga Australia hmun hrang hranga tui lianin kuminah mi 20 chuang nunna a la tawh a, a tam ber hi New South Wales (NSW)-a mite an ni.
Tuna an dinhmun mekah hian Greater Sydney-ah chuan inthiar chhuak tura tihna 100 chuang chhuah tawh a ni.
Hmun dang hmun 50-a chengte pawh lui liante kuang a liam tawh avangin insawn chhuak tura inring tura tih an ni a. Sydney bakah hian a bulhnaia Hunter leh Illawarra region-a chengte pawh inring tura tih an ni.
NSW-ah hian hmun thenkhat chuan ni li lek chhungin ruah mm 800 zet an dawng niin Bureau of Meteorology chuan a sawi a. Hei hi kumina Greater London-in ruah a dawn tawh let thum aia tam a ni.
Sydney-ah hian Thawhlehni atang khan ruah hi hân deuh tan tura sawi lawk a ni a; mahse, thli chak tak thaw tur sawi lawk a ni a, hei hian thingkung leh powerline chhia a tihtam hlauhthawnna a awm.
“Emergency hi a la zawh mai loh hmel hle a ni,” tiin NSW Emergency Services Minister Stephanie Cooke chuan a sawi.
Thuneitute chuan hmun hima insaseng tura an tih hnu ni hnihah pawh insaseng duh lo, a hnua chhanchhuah hna thawktuten an buaipui leh tho ngai an awm avangin na zawkin mipuite chu hmun him pan turin an nawr.
“I awmna ngaia i awm chuan i nunna i tiderthwang mai mai a ni,” tiin NSW Premier Dominic Perrottet chuan a sawi.
Tun tum tui lian hi mi tam tak chuan kumina an vawi thum tawrhna a ni tawh.
Kayak (lawngleng tenau chi) hmanga an in atanga a kawppui a chhanchhuah hnuah Tyler Cassel chuan tual chhung mite chuan an in leh lo leh an nunna atana ralkher an tawng mek tih a sawi.
Sydney daia Windsor-a a inah hian nikum khan an lut a, tui lian nasa hi kum 25, 50 vela vawi khat thleng chauh thin niin a sawi.
“Kuminah erawh vawi thum a ni ta,” tiin Australian Broadcasting Corporation a hrilh.