Health Minister Dr R Lalthangliana chuan Bangkok-a Thailand boxer laka hnehna changtu, a bial chhung, Cherhlun khaw mi, Zoramchhana chu lawmpuina tangkafai a hlan.
Tun hnaia ‘The Fighter - World Boxing Series, Space plus Bangkok’ neih zawh takah Zoramchhana hian a khingpui, Thailand boxer, WBA Asia Fly-Weight champion lo ni tawh, Yutthana Kaensa chu Bantan Weight-ah unanimous dicision hmangin a hneh a ni.
Dr R Lalthangliana hian a pisaah nimin khan Zoramchhana hi lawmpuina hun buatsaihsakin, “Hetiang hun tha kan hmang thei hi lawmawm ka ti a, MLA bial tam takin an neih loh hlawhtlinna ropui tak kan chang hi lawmawm ka ti hle a ni. Thingtlang khaw lian lutuk pawh ni lo atanga India ram pawn thlenga dinhmun sang tak kan thleng hi lawmawm ka tiin ka chhuang takzet a ni,” a ti.
India ram aiawh mi pali chauh Thailand-a boxing khel tura thlan zinga a tel chu a chhuan thu sawiin, a kal leh zelna turah duhsakna sang tak a hlan.
He hunah hian Dr. ZR Thiamsanga MLA pawh a tel a ni.