Aizawl : ZPM thalaiin National health mission hnuaia thawk te hlawh, sorkar laipuiin za-a 90 a tum hnuah Mizoram sorkarin a tum ve tur za-a 10 a pek ve mai ṭhin loh avangin thawktu ten rei tak tak hlawh an lak theih loh phah thin niin an sawi a. NHM-a thawk te hlawh hreng khawtlai tawh lo turin sorkar an phut.
Thenawm state-a NHM hnuaia thawk ten hlawh lak theih loh an sawi ve ngai lo niin ZPM thalai chuan an sawi a. Mizorama NHM hnuaia thawk te hlawh la mumal thei lo sawi tur a awm fo chu Health Minister mutthlûk der vanga an ngaih thu an sawi.
Health Minister-in Chief Minister, Finance Minister ni bawk Zoram- thanga lakah NHM hnuaia thawk te a chhan ngam lo a nih chuan mahni department enkawl hnuaia hnathawkte thlavâng pawh hauh ngam lo chu minister ni tlâka an ngaih loh thu ZPM thalai chuan an sawi bawk.