Aizawl : Chin Baptist Church (CBC) USA inkhawmpui lian Dallas, Taxas USA a neih zawh tak, hmanpui a thang mek Lalnunmawia Pautu, MZP President chuan nimin khan Indianapolis a pan a. He hunah hian Mizo Society of America Indiana Branch-te nen an inkawm.
Mizo Society of America (MSA) Indiana Branch-te chuan; MZP-in Mizo hnam humhalh kawnga a hmalakna te, khawvel puma Zofate inpumkhatna kawnga a hmalakna te leh Myanmar ram buai avanga Mizoram-a Zofa raltlante chhawmdawlna kawnga a hmalakna an lo hriatin ropui an tih thu an sawi a. MZP President Pu Lalnunmawia Pautu hnenah hian chawimawina thuziak an hlan.
Mizo Society of America (MSA) hotute chuan- Zofate inpumkhatna kawngah te, Mizo hnam leh Mizoram humhalhna kawngah te, Khawvel puma Zofate min thuikhawma min ti pumkhattu ni zel tura MZP an duh thu an lo hrilh bawk.