Kumin Wimbledon hmeichhe singles inelna lama champion tura rin hlawh telh telh Simona Halep chuan quarter-final lut turin minute 60 chauh a mamawh a. Seeded number 4 hauhtu Paula Badosa a nghaisa hneh hle.
Kum 2019 a SW19 a champion Halep hian Thawhtanni zanah 6-1 6-2 in Centre Court-ah a khingpui hi a hneh a. Spanish mi Badosa hian a khingpui khelhthat tum a tawn rualin a tihsual ngah a tuar.
Kumin Wimbledon a quarter-final lut zingah Romanian mi Halep chiah hi Grand Slam title la tawh awmchhun a ni a. Last 8-ah hian Amanda Anisimova a hmachhawn ve leh ang.
Halep hian kum 2020 khan Covid 19 hripui avangin a champion lallukhum humhimna hun a nei lova, inelna an thulh. Nikum khan inhliam avangin Wimbledon-ah hian a tel thei tawh lo thung.
“Centre Court a inkhelh leh ngei hi ka duhthusam a ni a, vawiinah ka inkhel thei hi ka duhdan tak a ni. Ka kheltha viau in ka hria a, Paula hmachhawn hi a awlsam ngai lo. Centre Court-ah entu tam tak hma a inkhelh leh hi thil nuam tak a ni.” a ti ve bawk.Kyrgios a la dam
Mipa inelna lamah chanchin ngah Nick Kyrgios chuan quarter-final a lut a. Dar hliamin tibuai mahse Brandon Nakashima 4-6 6-4 7-6 (7-2) 3-6 6-2 in a hneh.
Kum 27 mi Australian mi Kyrgios hi tennis khelh thiam tak mahse a thinchhiat leh sawihlawh taka a chet leh thin avanga beisei pha lo thin a ni a. Tun tum hi kum sarih chhunga Grand Slam quarter-final a luh leh hmasak ber a ni.
Ani bakah Rafael Nadal chuan Botic van de Zandschulp chu 6-4 6-2 7-6 (8-6) a hnehin quarter-final a lut ve bawk.