French champion Paris St-Germain chuan hun engemaw chen atang manager thar an nei dawn tih thawm a awm tawh chu an tichiang a. Mauricio Pochettino chhuahtirin Christophe Galtier an lalut.
Galtier hian kum 2024 nipui thleng contract a ziak phawt a. Thla hmasa khan Nice a chhuahsan fel a. Tun season liamta khan French Cup final thlenpui in Ligue 1-ah pangana a nihpui.
Kum 55 mi hian kum 2021 khan Lille enkawlin Ligue 1 title a chawipui a. Qatar Sports Investments hnuaia PSG an awm hnua coach thar an ruat pasarihna a ni.
“Paris Saint-Germain ka zawm thei hi ka lawm a, chairman Nasser Al-Khelaifi hnenah lawmthu ka sawi a. Football Advisor Luís Campos leh club ten ka chunga rinna an nghah ngam avangin lawmthu ka sawi.”
“He team ropui tak enkawl tura mawhphurhna ka kova innghat hi ka hria a, Europe-ah a tha ber ni thei tura squad tha leh tum nei sang tak kan nei.” tiin a sawi.
Galtier hi tunhnai kum 10 chhunga Paris St-Germain in league title an chawi tur dang thei tu coach pahnih zing ami a ni a. Kum 2016-17 season khan Leonardo Jardim-a hnuaia AS Monaco in an dan hnuah Lille a enkawlin a dang ve leh bawk.
Lille a champion pui hnu hian a hna atanga bang in Nice ah kum khat hna a thawk leh a, heng club pahnihte hma hian Saint-Etienne a enkawl tawh.
Kum 50 mi Pochettino hi thla hmasa khan chhuak tura chiang tawh anga ngaih theih a ni a, nimahsela PSG lamin la puang lovin manager thar an puan dawnah an puang chiang chauh.
Thla 18 a enkawl chhungin season liamta khan Ligue 1 title a chawipui a. Hemi hma hian French Cup-ah a champion pui bawk. A contract tihtawp a nih dawn avanga zangnadawmna a hmuh tur chungchangah PSG nen hian inbiakna an neih vangin a chhuah thu hi puan a ni lawk lo.