Aizawl: Samagra hnuaia thawk inzawmkhawm pawl, Federation of Mizoram Samagra Employee (FEMSE)-in an hlawh chungchanga sorkar hmalakna kal zelah lungawina an hmuh loh avangin nimin atang khan an hnathawhna hmunah badge dum an bel tan a, hei hian awmzia a la nei lo a nih chuan tun thla ni 11 atangin pen down strike an nei dawn.
FEMSE thuchhuahin a tar lan danin Samagra hnuaia thawkte hi kum 2019, November khan an hlawh chungchangah lungawi lovin an nuar tawh a. Sorkarin study team dinin, study team rawtna chu finance deptt-in a enfiah hnu, a kaihhnawih deptt. hrang hrangin an ngaihtuah hnua CM-in a pawmpui hnuah cabinet meeting agenda-ah dah niin, pawm a ni ta lo a ni.
An hlawh chungchanga study team rawtna, finance deptt. kaltlanga chief ninister pawhin a pawmpui tawh cabinet meeting-in a pawm thei ta lo chu mak an tih thu leh an rilru a nat thu FEMSE chuan an sawi a. Na zawka sorkar nawr an tum tak thu leh an ruahmannaten awmzia a la nei lo a nih chuan tun thla ni 15-ah FEMSE Council-in an kal zel dan tur a ngaihtuah tur thu an sawi bawk.
FEMSE chuan an hlawh chungchangah Education Minister Lalchhamdama Ralte leh a enkawl education deptt-in theihtawp an chhuahpui avanga lawmawm an tih thu an sawi a. La hlawhtling lo mah se, beiseina sang tak an neih thu an sawi.
An hmalaknain a nghawng turte avangin zirlai, nu leh pa leh mipuite hriatthiamna an ngen tih an sawi bawk.