Aizawl Municipal Corporation, Central YMA hruaitute leh Save Mizoram River hruaituten nimin khan Tlawng lui tibawlhhlawhtu leivung paih thinna hmun an tlawh.
AMC hotute leh pawl pahnih hruaitute hian Tuikual lui tlawhin, Ebenezer Hospital bul hnai bakah hmun dang atanga bawlhhlawh leh leivung an paihna thinte chu a theih chin chin hung tura hmalak an rel a, Tuithum lui bul hnaia AMC-in leivung paih phalna a lo pek tawh leh an paih mekna hmunte chu a bul hnai maia lui luang a tihbawlhhlawh bakah Tlawng lui fintu a nih avangin a hmunah hian municipal commissioner chuan stay order a pe nghal bawk a ni.
Maubawk leh Lawipu ram lama a ruka leivung an paihna thinte pawh a hmunah tlawh chhuakin a ven dan tur kawng ngaihtuah hovin ruahmanna an siam bawk a ni.
AMC hotute leh Central YMA hruaitute chuan Aizawl mipui zawng zawngte Tlawng lui tibawlhhlawh thei zawnga tumah hmala lo turin an ngen a, tun atang chuan dan lova bawlhhlawh leh leivung paih thinte chu na zawka dan hmanga hrem an nih zel tur thu an sawi a; an hmalakna kawnga thawhpuiah Aizawl mipui an sawm.
Leivung paihna hmun an tlawhnaah hian AMC atangin Mayor Lalrinenga Sailo hovin AMC official-te an tel a, YMA lam atangin OB leh CEC member eng emaw zat telin, Save Mizoram River pawl atangin Adviser Vanramchhuangi leh hruaitu dangte an tel a ni.