SEKI Inter Village Band Contest SEASON 2 chu July 8, 2022 Zirtawp zan khan Vanapa Hall-ah a hmawrbawkna final neih niin, Serkawn VC hminga chhuak Lung-lei tlangvalte’n ‘ber’ nihna an hauh.
Mak danglam angreng takin, Leitlang tlangvalte hian a nawlpuiin kan tuipui lem loh leh ngainat em em hran loh Jazz Fusion nen an rawn inlan a, huaisen tak maia an an tuina an rawn dinchhuahpui kha an fakawm em em!
Judges hawi her zau leh tunlai rimawi khawvel inher hret hret dan te, insingsak chhoh dan te mai bakah thil thar vawrhchhuahna lama rilru pe a, ngaihven thei reng te kha chawimawi an phu hle bawk.
A tlangpuiin, beat contest-ah hian rimawi ngan leh pui tak tak, maksak leh ri buan buan hi kan hmuh leh ngaihthlak tam zawk a ni fo. Chutih rualin, thiam leh theihna tehna tanfun nghet bur angah ngaih tlat tumna erawh a dik ber lo thei.
Zollywood lamah pawh hmahruaitu ni fo, thil thar vawrhchhuahna kawnga hmakhalhtu ni fo thin bawk Leitlangpui hian rimawi lamah pawh an duai lohzia an rawn lantir chiang a, an chhuanawmin, pakhatna nih an phu hliah hliah.
Open category result:
Winner: Serkawn VC, Lunglei
1st Runner Up: Chanmari West LC Polysphere
2nd Runner Up: Electric Veng LC
Best Vocalist: Lalremruata (Ramthar Veng LC)
Best Guitarist: Gabriel Lalhmangaihzuala (Serkawn VC, Lunglei)
Best Bassist: Lalhmangaihzuala (Chanmari West LC Polysphere)
Best Keyboardist: Lalrinsanga (Electric Veng LC)
Best Drummer: R. Vanlalzawna (Serkawn VC, Lunglei)