Bodo hel pawl, tun hnaia indin thar, National Liberation Front of Bodoland (NLFB)-a tel mi 23 chu Pathianni khan Assam khawthlang lama Kokrajhar district, Indo-Bhutan ramri bula Jharbari-ah an inpe leh.
NLFB hel pawl mi 23-te chu an pawl platoon commander-a inchhal, B Harfer-a hovin Indo- Bhutan ramria ram hnuai atangin Pathianni tuk khan an chhuak a, police venhimna hnuaiah an awmna tura camp an buatsaihah an awm zui rih ang.
Hel inpete hi khaw mi tam tak lo pungkhawmin an lo lawm a, tui in tur leh pangpar an lo pe hlawm.
He hunah hian NLFB hel pawla tel, khawtuala lo awm sa eng emaw zatin an thiante hi an lo dawngsawng bawk a. Nunphung pangngaia an let leh tur chu an lawm.
June 22 khan NLFB hel pawla mi 23 chu an lo inpe tawh bawk a. An zingah hian an pawl hotupa ber, M Batha pawh a tel.
Batha kaihhruai NLFB hi nikum khan din a ni a. Din a nih hma hian National Democratic Front of Bodoland (NDFB) hel pawla a chi liten nikum January thlaa sorkar laipui nen Bodoland Accord an siam hnuah khan an inpe a, he inremnaa lungawi zo lote hian pawl thar hi an din leh a ni.