Mizorama vawk pul hri, African Swine Fever (ASF) hri leng thawh hnihna thleng mekah vawk 7,383 a thi tawh a, a len thawh khatnaa vawk suat neitute hnenah zangnadawmna tur sum sanction a ni tawh a, an bank account-ah sum thun thuai beisei a ni.
ASF leng thawh khatnaah khan hri darh zel tur ven nan hri kai vawk tam tak chu suat a ni a, heng vawk neitute hnena zangnadawmna pek tur hi state sorkarin sorkar laipui a dil a, March thla khan sorkar laipuiin a tum tur a rawn pe tawh a, chumi leh state sorkar tum tur sum chu tun hnai khan sanction order tihchhuah a ni.
The Zozam Times zawhna chhangin Vety Minister Dr K Beichhua chuan sum sem theih turin finance department-in sanction order a tichhuak tawh a, sum la chhuak turin bill an siam mek a, a taka sum hmuh a nih hunah zangnadawmna dawng turte bank account-ah thun nghal a ni dawn tih a sawi.
Vety minister chuan sum hi a taka an dawn hun tur hi sawi lawk theih loh mah se hun reilo tê hnuah chuan zangnadawmna dawngtute hian a taka sum an dawn vat an beisei tih a sawi bawk.
ASF leng thawh hnihna thleng leh mek chungchangah Vety minister chuan hri laka invenna damdawi a awm loh avangin vawk vulhtuten theihtawp chhuaha hri laka an vawkte a him theih nan hma an lak a tul hle tih a sawi a, vawk pul hri leng mek chungchangah sorkarin a tih tur theihtawp chhuahin a tih zel thu a sawi bakah hri do kawngah ram mipui tanrual a tul thu a sawi bawk a ni.
Vawk pul hri leng nawn leh hi Champhai district atanga intanin kumin February 4 atang khan he district-ah hian a hri kai hmuh chhuah tan a ni a, nimin khan vawk 10 a thih belh a; vawk 33 suat a ni bawk.
Nimina vawk thi belhte nen hri leng thawh hnihnaah vawk 7,383 a thi tawh a, vawk 6,359 zet suat tawh a ni bawk.