Aizawl: Mizoram Pradesh Youth Congress Committee (MPYCC) chuan tun hnaiah Mizoramah Covid-19 hri kai an pun avangin inveng fimkhur turin mipui an ngen.
Congress Thalai thuchhuah chuan Covid-19 lakah inven lawk loh chuan MNF sorkarin Covid-19 leng laka inven dan a hriat leh thiam chhun inkharkhip, (lock down) puan leh bak hmachhawn tur a nei dawn lo tih an sawi.
Hri leng vanga hun rei tak MNF sorkarin inkharkhip a puan avanga mi rethei leh harsa zawkte retheih leh manganna thleng nawn tawh lo se an duh tih sawiin, inkharkhip puan kher ngai tawh lo turin mipuite fimkhur turin an ngen tih an sawi.
Thuchhuah chuan tun hnaiah Mizoram-ah Covid-19 kai an pung nasa hle a, July 8, 2022 khan Mizoramah hri kai thar 61 hmuh chhuah a ni.
Tuna Mizoram Covid-19 dinhmun chu hri kai hmuh tawh zat 2,29,670 a nih thu leh, dam tawh 2,28,439 an nih thu te, enkawl mek hi 525 niin thi 706 an awm tawh tih an tar lang.