Assam-a Nowgong bialtu MP, Congress hruaitu hlun, Pradyut Bordoloi chuan an state-a tui lian chu national calamity/disaster-a puan leh sorkar laipui atanga tanpuina tam zawk pek a phut.
MP dangte hnena lehkha a thawnah hian inlungruala a thil duh chu sorkarah nawr ve turin a duh tih a hrilh.
Bordoloi chuan, “Kan state-a tui lian nasa takin chhiatna a tawh mek laiin hei hi ka lo thlen a. Thla khat lek chhungin Assam-ah tui lian thawh hnihna a thleng a, tun hma lam aia nsa leh lui kam lei tha pawh luang ral nasa zawk a ni,” a ti.
A lehkhaah hian, “Assam-a khuarel thil thleng leh tui lian hi huang zau zawka sorkar laipui inrawlhna tur a ni a. Hetianga tui lian leh lui kam lei tha liam hi Assam ang state, hetianga innghat tan phei chuan en liam chi a ni lo,” a ti.
Lok Sabha zawhna leh chhannaah NDRF sum chu Assam tan kum 2018-19, 2019-20 leh 2021-22-ah pek a ni lo tih tar langin, “Kum 2020-21 khan state sorkarin Rs vaibelchhe 2,642.99 a dil chungin Rs vaibelchhe 44.37 chauh pek a ni,” a ti.
MP chuan, “Hetiang dinhmun han thlir hian hun rei tak ata tawha an lo tawrh thin, Assam tui lian hi national calamity-a puan a tul a, Assam tan harsatna lian tak a thlen a ni,” a ti.
Congress MP hian parliament fur thutkhawm awm turah hian Assam atanga a MP-puite chu an state tana au chhuak ngei turin a sawm.
“Party tina Member of Parliament zawng zawngte hi party-a nihna dah thain state khat kan nihna anga tui lian venna leh lei tha a lak bo nasat dan hi aupui turin ka ngen a, national calamity-ah puangin, Union Ministry of Jal Shakti-ah pawh a ven dan tur thlena Standing Committee on the Water Resources on 2020-21 anga kal turin ngen ang u,” a ti a ni.