Aizawl: Mizoram sorkar flagship programme, SEDP hnuaia family oriented programme chu state pum leh district tinah tlangzarh thuai a ni dawn.
SEDP kalpuina kawnga thuneitu sang, SEDP Governing Board chu nimin khan Chief Minister Zoramthanga hovin CM Conference Hall-ah an thukhawm a, family oriented SEDP programme tlangzarhna chu state pum leh district tinah buatsaih thuai an rel.
SEDP Governing Board thukhawmin a rel dan chuan programme hi state level-a tlangzarh a nih hnuah a tahtawlin district level-ah tlangzarhna buatsaih leh a ni dawn.
Family oriented SEDP hi a thawh khatnaah hian constituency tina tanpuina dawng tura thlanchhuah atangin a zatvete chu puihna dawng turin SEDP Governing Board chuan an rel a, a thawh hnihnaah a bak zawng puihna pek leh turin an rel.
SEDP dawng turte hnena tanpuina sum pek chu department-te mawhphurhna a nih angin an district office theuhte kaltlanga District Level SEDP Committee hriatpuinaa pe chhuak tura ruahmanna siam turin board thukhawm chuan a rel bawk a ni.