Mizoramah COVID19 kai an pun chhoh leh tak avangin Disaster Management & Rehabilitation Secretary-in nimin khan district tina disaster management authority hotu leh Bawrhsap te lehkhathawnin, COVID19 laka himna tura tih tur hrang hrang – Covid appropriate behaviour (CAB) khauh taka kengkawh thar leh turin a hriattir.
DM&R Secretary-in district thuneitute lehkha a thawnah chuan COVID19 a darh zel loh na tura mitin tih tur te tarlan a ni a. CAB zawm that a nih leh nih loh pawh thlithlai turin a ti bawk.
CAB-a tarlan a nih angin kohhran, khawtlang leh sports lam thil tihna te bakah thil danga punkhawmna reng rengah te thusawi lai leh zai lai te pawhin hmai tuam tur a nih thu leh midang nena inhlata awm tur a nih thu DM&R Secretary lehkhaah chuan tarlan a ni a. Phalna neia thil tih leh punkhawmna te hri leng laka himna tura inkaihhruina te tha taka zawm a nih theih na turin a mawhphurtu bik thuneitu ten hma an la tur a nih thu a tarlang.
Office, dawr leh hmundangah te thuneitu theuh ten faina leh thianghlimna kawngah mawh an phurh thu leh beauty parlour, Spa, Gym leh lumehna dawr neitute pawhin an hmanraw hrang hrang te an tithianghlim fo tur a nih thu a tarlang bawk.
Nimin vek khan Aizawl bawrhsap pawhin CYMA lehkha thawnin, COVID19 laka invenna chungchanga mipui hriattur pawimawh te YMA information centre atanga puansak tura YMA branch tin te hriattir turin a ngen bawk a ni.