Aizawl: Zu khapna dan tlawhchhan tur mumal nei mang loa khawsak harsa zawkte chunga thuneihna hman sual avanga thihna hial thlengah Congress party chuan Excise Minister Dr K Beichhua chu mawhphurhna laa bâng turin an phut.
Nimina Congress party thuchhuah chuan March 25, 2022-a Council of Ministers thukhawmin MLP Draft Rules, 2022 chu pawm tawh mah se Government Gazetted-ah chhuah a la nih loh avangin hman theih a la nih loh laia dan tlawhchhan tur mumal nei mang loa khawsak harsa zawkte chung an thuneihna an hmang sual hi a dik lo a, chumi avanga thihna hial thleng chu pawi an tih thu an sawi a. He thihna chungchangah excise minister chu mawhphurhna laa bâng turin an phut tih an sawi.
Congress party chuan MNF sorkar chuan grape wine chungchangah a dinna tichiang vat tura an phut thu te, a intiam anga grape wine an mansakte hnena a rang lama pe kir turin bialtu MLA Dr ZR Thiamsanga leh END Minister Dr K Beichhua te an phut tih an sawi bawk.
May 27, 2022-a excise dept-in Millennium Centre-a grape wine zawrh lai an mansak hlut zawng Rs. nuai 22 vel neitu, Lalhriatpuii, Dawrpui Vengthar chu mangang tak chunga sumdawnna dang neih a tum mek laia a boral ta thut chu pawi an tih thu an sawi.
“Grape Wine an mansak avanga rilru hahna nasa tak tuara boral ta, Pi Lalhriatpuii chhungte leh grape wine an mansakte hnena zangnadawmna pe ngei turin Mizoram sorkar kan phut a ni,” Congress party hian an ti.