AIZAWL: Lunglei district Congress committee (LDCC)-in Civil hospital Lungleia ENT doctor dah turin sorkar an ngen a. ENT doctor an nei chu Lunglei district mipui tan a manganthlak hle tih an sawi.
LDCC chuan Lungleia ENT doctor awm lai chu zirna sang zawka a kal dawn avangin tun thla ni 1 atang khan ENT doctor chu an nei ta rihlo nia sawiin, zirna sang zawk zira kal tur ENT doctor chu a zirna turah duhsakna an hlan.
Doctor ten zirna sang zawk leh thiam belh zelna tura rilru leh ngaihtuahna an seng chu tha an tih thu leh thlamuanthlak an tih thu LDCC chuan an sawi a. Zirna sang zawk zir tura kal te hmun a ruak ta reng chu a manganthlak an tih thu an sawi a. Harsatna lian zawk a thlen hmaa phut chuhah leh nawr kher ngai lova Civil hospital Lungleia ENT doctor dah ngei turin Mizoram sorkar an ngen.
LDCC chuan Lungleia DEO Complex hawn tak chu Congress sorkar hmalakna kalzel a nih thu an sawi a. Engineering college, Pukpui ami erawh tipuitling tura hma la hleithei lovah MNF sorkar chu puhin, pawi an tih thu an sawi.
Pukpuia Engineering college chu kawng a chhiat lutuk avangin Chief Minister-in a tlawh thei lo tih sawiin, LDCC chuan zahthlak an tih thu an sawi a. "Engineering college dinhmun a hriatchian loh zia leh a ngaihsak loh zia lantirna a ni a, Lunglei North bialtu MLA tan tak pawh zahna tham a ni" an ti.
Kum tlemte a la awm chhungin thil chhinchhiahtlak leh tha tak hnutchhiah turin MNF President, Chief Minister ni bawk Zoramthanga chu an ngen tih LDCC chuan an sawi bawk.