Burnley defender Nathan Collins chuan Wolverhampton Wanderers zawm turin medical a nei a, Pound maktadduai 20.5 in a club thar tur hi a zawm fel thuai dawn.
Republic of Ireland international hi Wolves-ah a insawn fel chuan Bruno Lage-a pawlten tun nipui a player an lakluh hmasak ber a ni ang.
Wolves tlarhnungah contract hmang zo Romain Saiss-a hmunruak a luah dawn tihna a ni a. Kum 21 mi hian nikum nipui khan Burnley hi Stoke City atangin kum li chhung atan a zawm.
Clarets hian season liamta chawhma lamah khan first team-ah chhawr a hlawh lova, nimahsela March thla a captain Ben Mee a inhliam hnuah rin berah tang zuiin an tan vawi 22 a inkhel a, goal hnih a khung.