English club Manchester United chuan Barcelona atanga Dutch midfielde Frenkie de Jong lakluh an tumna a hmalam an pan hleihtheih loh chu chinfel ngei an tum a. An club chief executive officer Richard Arnold leh director of football John Murtough te chuan hmaichhawn a indawrna kalpui turin Barcelona an pan.
Kum 25 hi manager thar Erik ten Hag-a’n tun nipui a player lakluh tura a dah hmasak ber a ni a. Barcelona hian sum an mamawh avangin hralh an pawi ti lova. Mahse a man zat an phut hnem bakah De Jong-a hlawh an batsak hnem avangin thil a kal chak thei lo.
Spanish club hian De Jong-a hlawh hi Covid 19 hripui len laiin an tihhniam sak a, henga an pek lohte hi tunhnai kum li chhunga an pek turin an tiam.
Dutch midfielder hian club chhuahsan a duh lo niin sawi thawm awm mahse a coach lo ni tawh Erik ten Hag-a hnuaia khelh hi a hreh lova. Mahse a hlawh an bat chu kalsan mai a duh loh avangin Barca nena inremna a awm thei rih lo.
United hian De Jong hi an lalut hlawhtling thei dawn lo a nih chuan midang an mamawh ang an ngaihven dawn tih an zep ngai lova. Nimahsela an club hotu pahnih ten Catalonia khawpui an pan avangin De Jong hi tihfel thuai an duh ni ngeiin a lang a. Ni lo se an pahnih zinga pakhat hi United in pre-season inkhela nizana Liverpool an hmachhawn tumin Thailand a awm ve ngei tura ngaih an ni.Martinez?
United hian Ajax a khel Argentine defender kum 24 mi Lisandro Martinez chu lakluh ngei an duh a, a club lamin Euro maktaduai 50 an phut laiin Euro maktaduai 45 in lei dilna an thehlut.
Tlarhnung leh defensive midfielder anga chhawr theih Martinez pawh hian Premier League a khelh a duh avangin club hnenah chhuah a duh thu a hriattir tawh a. Hetihlai hian Arsenal pawhin lei an dil player hi Ajax in dawrna an dawn an la pawm lo ve ve.