National Health Mission, Mizoram hnuaia thawkten sorkara an thil phutte tihhlawhtlin ngiata sorkar kar nana ni thum chhung chawlh an lak hnuah sorkar atanga thu lawmawm an dawn loh avangin tiam chin awm loin nawrh an chhunzawm dawn.
July 11 atanga khan NHM Employees Union, Mizoram (NEUM) huaihawtin NHM hnuaia thawkte hian chawlh an la tan a, an ruahman lawk dan chuan nimin thlenga chawlh la tur an ni.
Thawhlehni zan khan nawrh an huaihawt chungchangah hian Deputy Chief Minister Tawnluia, Health Minister Dr R Lalthangliana leh health department-a principal secretary te nen NEUM hruaitute an thukhawm a, an thurel minute chu nimin khan tihchhuah a ni a, hetah hian demand hrang hrang atana an lungawina khawp an hmu lo.
Nimin tlai khan NEUM Executive Committee an thukhawm chhunzawm nghal a, sorkar hotute nena an indawrnaah an thil phut chungchangah hmasawnna a awm loh avangin tiam chin awm lovin nawrh chhunzawm an rel ta a ni.
Tar lan tawh thin angin, NEUM hian a hun taka hlawh lak, medical re-imbrushment neih ve, transfer TA neih leh health department-in hna a lakah NHM contractual staff-te tana hamthatna neihtir te sorkarah an phut.
Tiam chin awm loa nawrh an tum chungchanga thuchhuah an siamah NEUM chuan, an harsatnate chu sorkarah vawi tam an thlen thu leh sorkar hotu lamin hri leng a ziaawm hunah hmalak an tiam tih an sawi a, Covid-19 leng dona kawngah thih ngam lupua hna an thawh laiin an thla tin hlawh erawh thlakipa pek an nih ngai loh tih an sawi.
Nikuma an nawrh an huaihawt khan an dinhmun zirchiangtu tur study group din a ni a, chumi report pawh April thlaah peih fel a nih tawh laiin cabinet meeting-ah erawh ngaihtuah a ni chuang lo tih sawiin, sorkarin fahrawn en takin a en nia an inngaih thu an sawi.
Hlawh an lak mumal loh chungchangah hian Supreme Court-in order a nei tih sawiin, “Supreme Court order No. F. COVID-19/60/2020 –ME(Pt. I) Dt.18th June, 2020 tihchhuahah chuan ‘kan hlawh a hun tak a min pek loh hi dân kalh a ni’ tiin order chhuah a awm,” an ti.
An thil dil hrang hrangte tihhlawhtlin kawngah hmasawnna beisei anga a awm loh mai piah lamah an thawh hlawh takngial pawh a hunah an la thei lo chhunzawm reng maite chu manganthlak an tih thu leh hemi avang hian ni thum chhung chawlh an la ta tih an sawi a, tuna an nawrh chhunzawm turah hian mipuite hriatthiamna an ngen tih an thuchhuahah chuan an tar lang bawk.