Mizoram assembly committee on local fund accounts (COLFA)-in Chhiahtlang daia Serchhip solid waste management centre hmunhma tura buatsaih mek tlawhin, hnathawh dan an zirchiang.
Sorkar thuchhuahin a tarlan danin, Serchhip khawpui tana Solid waste management centre hi Chhiahtlang daia Tualthah mualah buatsaih a ni a, a hmunhma zau zawng sq.mtr 4000 a ni. A hmunhma buatsaih hna thawh nan Special assistance for capital expenditure free loan (SASCE) Rs nuai 60 hmuh a ni a, a panna kawng, main gate, site office, RCC Tuizem, Internal road, bawlhhlawh thliarna tur platform leh a hung hnate thawh tawh a ni a, Contractor Lalthianghlima a ni.
Kumin January thlaah hna tanin, zawh thawkhat a ni tawh a. Solid waste management centre puitling sak chhunzawmna tur sum dap zui mek a nih thu sorkar thuchhuah chuan a tarlang.
COLFA Chairman C. Lalmuanpuia'n tunlai khawvelah bawlhhlawhin harsatna a thlen nasa tih sawiin, "kan changkang zela bawlhhlawh kan ngah tial tial a, mipui kan pung ve zel bawk a, nakin thlenga kan ramin kan mamawh bawlhhlawh sawngbawlna tha hi kan mamawh em em a ni" tiin, COLFA pawhin an ngaihpawimawh thu a sawi bawk.
Serchhip tana Solid waste management centre buatsiah mek tlawh hian COLFA chu an Chairman C. Lalmuanpuia hovin member te - Nihar Kanti Chakma, C. Lalsawivunga leh Dr. Vanlaltanpuia te an kal a ni.