Aizawl: State sorkara thil phut hrang hrang neia nuar mek, National Health Mission (NHM) hnuaia thawktute harsatna a rang thei ang bera sutkiansak turin a phut tih ZLP Leader Lalduhoma chuan a sawi.
Nimin khan thuchhuah siamin Lalduhoma hian NHM hnuaia hnathawkte hi sorkar laipuiin an harsatnate phuhruk tura a chhawrsakte niin kum khuaa sorkar laipui ring tur an nih loh thu leh zawi zawia state sorkar kuta awm tur an nih thu a sawi a. State zawng zawng tih theih deuhthawin NHM hnuaia thawktute a dah ngheh tawh laia Mizoram sorkarin mi pakhat pawh dah ngheh a la nei lo tih sawiin, sorkarin an harsatnate zirchiang tura study team siamin report theh lut mah se, an zir chhuah leh rawtnate an thup tlat avangin loh theih loh avangin an nuar ta tih a sawi.
Lalduhoma chuan health department hnuaia NHM-ah hian thawktu zaa 60 vel awmin tunah hian an chawl ta vek a. Hengho tel lo hian damlo enkawlna a kal mumal thei loh avangin harsatna nasa zawk a thlen loh nan sorkarin a tihdan a ngaihtuah a ngai a. Hetih laia sorkarin hna atanga chawlhtir tura a vau zui hi hriatthiam har a tih thu a sawi bawk.
“Heng kan unau nuar mekte kan sorkar hian a tuam dam thei lo hi a pawi kan ti a, damlo tam takin nunna hlu tak an chân phah mai ang tih kan hlau a, heng kan unau nuar mekte hi kan lainat a, an harsatnate a rang thei ang ber a sukiang turin sorkar kan phut a ni,” a ti.
Lalduhoma chuan sorkar hi a duhna lamah chuan a chakin, contract hna inpekah chuan an chak tih a sawi a. Tuna lungawi lote hi chu damlo enkawlna thil a nih avangin an damdawi pe vat turin an phut tih a sawi.