Aizawl: Health minister hovin mi pawimawh dangten nimin khan State Level Expert Team on Covid19 Management (SLETOCOM) rawtna siamte an thlirho va. Mipui tana phurrit lo leh eizawnna nghawng nasa lo thei ang bera inkaihhruaina siam tul an tih thu an sawi.
Hri kai inringhlelte tan a rang thei ang bera sample test a pawimawh thu sawiin natna lang chhuak (symptom nei)-te pawh an natna a lan chhuah veleh a rang thei ang bera in-test thin turin an ngen a. Mahnia sample in-test (self test) pawh IDSP-ah emaw, anmahni bialtu health department hotute hnenah emaw in-report thin turin an ngen.
Health minister hova thukhawm chuan hri kai tharte chu an natna a serious a nih loh chuan home isolation (mahni in lama inenkawl) uar a that thu sawi an sawi a. Omicron variant a nih tlangpui tawh avangin hri kai chhungte quarantine hranpa a tul loh thu leh fimkhur taka mask leh kutkawr nen hri kaite enkawl a him thu an sawi.
CAB tha taka vawn a pawimawh thu leh contact tracing leh exit test a tul loh thu sawiin, hri kai enkawl mekte chu uluk taka vila an natna a zual deuh erawh chuan a rang thei ang bera damdawi in panpui emaw, in-report emaw a tul thu an sawi bawk.
COVID-19 vaccine lak a pawimawh thu pawh sawiin, a bikin precautionary dose lak hun tawhte leh 2nd dose lak hun tawh ten lak ngei tur a nih thu an sawi a. Precautionary dose private hospital-ah chauh lak theih tia sorkar laipui thupek chu tihdanglam a nih thu leh India ramin zalenna a hmuh kum 75-na denchhena vawiin atanga chhiara ni 75 chhung chu precautionary dose a thlawna sorkar vaccination centre atanga pek chhuah a nih tur thu sawiin, precautionary dose la thei chin 2nd dose lak hnu thla kua tih pawh thla rukah a lak theih tawh thu an sawi bawk.