Assam Chief Minister Himanta Biswa Sarma chuan an police-ten mi sual an beihna kawnga civil mi kut an thlak tel sawi thawm a awm mek karah an kal zel dawn tih a sawi.
Sarma hian Assam police hmalakna tam takin sawisel a hlawh mek laiin hetiang thu hi a sawi.
Thuchhuah a siamah Sarma chuan Assam chief minister a nih angin police tihduhdah chu a pawm theih zawng a ni lo tih a sawi.
“Assam police beitu chu an tih ang bawka chhan let tur a ni a. Chief minister ka nih chhung chu hnungtawlh mai turin ka duh lo,” a ti.
Police-te chuan anmahni inven nan silai hmeh puak theihna an nei niin a sawi a. “Police-te hi mahni inveng ve lo tur chuan ka ti thei lo,” tiin Sarma hian tun hnaia an state police-ten pawisawi lote an bei (fake encounter) a awm thin tih an sawi chungchang chu a sawi fiah.
Hetih lai hian Assam Human Rights Commission (AHRC) chuan chanchinbua lang angin hemi chungchangah hian thil chiang zawk sawi turin sorkar an ngen.
AHRC hian state sorkar hi thla hnih liam ta chhunga police silai hmeh puaha hel leh thil tisualtu mi 12 thihna leh mi panga hliamna chu chhui chianga thil thlen dan kimchang puang turin a ti.
Commission hian Assam police-te chu thla khat chhunga an report thehlut turin a ti bawk.
Hetih mek lai hian National Human Rights Commission (NHRC)-ah Assam police-ten mihring dikna chanvo an palzut tia hekna a lut mek bawk.