India khaw pakhata police-ten auto-rickshaw tlanchak lutuk an tihdinah thil danglam tak an hmu a, a lirthei len zawng nena ngaihtuaha a chuang zat an hmuh chuan awihawm loh hial a ni.
Social media-a Fatehpur-a thil thleng video thehdarha a lan dan chuan naupang leh puitling zawng zawng nen rickshow-ah hian mi 27 zet an lo chuang a ni.
A lan dan chuan police pakhatin a chuangte chhuk apiang chu a lo chhiar nghauh nghauh a ni.
Auto-rickshaw-ah hian a pangngaiah chuan mi pathum an chuang thei a, tlema tihdanglamte erawh chuan mi paruk an phur thei.
He thil thleng hi India rama mihring cheng an tam berna state, Uttar Pradesh-a Fatehpur khuaah nia sawi a ni.
Chanchinbuten an tar lan dan chuan a tlan chak em avangin police-in tihdin tumin an lo phar a; mahse, a khalhtu hian a tiding duh lo va. Police hian umzuiin an tiding ta a ni.
“Police hian an tihdina chuti zat zeta tam passenger an lo awm an hmuh chuan a barakhaih tak zet hlawm a ni,” tiin Fatehpur Superintendent of Police Rajesh Kumar chuan Times of India chanchinbu hnenah a sawi.
Autorickshaw hi phal chin aia chaka a tlan avang leh chuang thei zat aia tam an chuan avangin man a ni.
Social media-a video thehdarh a nih hnuah mi sang telin an en tawh a, Twitter sawi zuitu tam tak chuan nuihzatthlak an tih thu an sawi hlawm.
Hetih lai hian mi thenkhat chuan ‘world record’ a nih theih hial an rin thu leh India rama inkalpawhna hmanrua a la that tawk lohzia tar langtu nia an ngaih thu an sawi ve bawk.