Chelsea in tun neitu thar hnuaia an player langsar hmasa ber an lalut a. Manchester City atangin Pound maktaduai 50 in England forward Raheem Sterling an lei fel.
Kum 27 mi hian Stamford Bridge-ah kum nga contract a ziak a. Blues in United States a pre-season tour an neihnaah a pan ve nghal.
City hian kum 2015 khan Sterling hi Liverpool atangin Pound maktaduai 49 in an lei a. An hnena a cham chhungin an tan vawi 339 inkhelin goal 131 a khung a. Premier League title pali a chawi ve hman.
England tana vawi 77 inkhel tawh bawk Sterling hi Chelsea manager Thomas Tuchel-a’n neitu thar Todd Boehly kaihhruai hnuaia an awm hnua player manto an lakluh hmasak ber a ni a.
Defender pahnih Kalidou Koulibaly leh Nathan Ake ten an zui lut thuai bawk ang.
“Ka football khelh hun chhungin hlawhtlinna tam tak ka tawng tawh a, thil tam tak ka paltlang tawh. Mahse hlawhtlin belh duhna lian tak ka la nei a, Chelsea kawr ha chunginhengte hi hlenchhuah ngei ka tum. Thomas-a enkawlna hnuaiah ka tum te hi ka hlen dawn a ni.” tiin a club thar a zawm hnuah a sawi.
“London hi ka seilenna khua a ni a, tunah ka thiante, ka chhung leh khatte hmaah kartin Stamford Bridge-ah ka inkhel thei tur hi thil ropui tak a ni. Chelsea fans te hma a inkhelh hlan ka nghakhlel tawh hle. Bul tan thuai ka chak tawh a, khelmual chhungah ka theihna in ka sawi duh chu ka sawi ang.” a ti.
Sterling a manah hian Chelsea in a khelhdan a zir a City hnena pek tur zat an nei a, an inrem dan erawh puanzar vek a ni lo. City-ah hian kum khat contract a la neih avangin Pep Guardiola pawlten sum hlawm tam zawka an hralh theih laia hralh an thlang a. Europe club lian thenkhat zingah pawh ngaihventu a nei nual.
Chelsea chairman Boehly chuan, “Sterling hi player hlawhtling thin, trophy tam tak chawi tawh a ni a. Kan squad in hma a sawnna tura player lakluh pawimawh tak a ni. Stamford Bridge-ah world class player inkhel hmuh kan chak tawh hle.” a ti ve bawk.“Chelsea ruangam thlaktu a ni ang”
Blues in an tlarhma siksawi an tumna kawngah Sterling hi langsar taka an chetna hmasa a ni a. Belgian striker Romelu Lukaku an chhuah tir tawh a, Callum Hudon-Odoi leh Hakim Ziyech te hmalam hun a chian loh bawk avangin a pawimawh.
Anni pathum bakah Christian Pulisic, Timo Werner leh Kai Havertz te chu hliam vang emaw beisei anga khelh loh avanga rinrawl a neih aia han awl tir an neih leh thin bawk avangin a hmalam duan that an duh.
Boss Tuchel pawhin, “A theihna anga a inkhelh mai pawh hian kan team hmelhmang a thlak danglam thei ang. Kan tan mi pawimawh tak a ni dawn.”
“Player ropui takah ka ngai a, English football-ah huhang a ngahna hi a namai lo. Tunah chuan naupang zawkte entawn turin a upat lamah pawh duhthusam chiah a ni.” a ti.