Sri Lanka Prime Minister Ranil Wickremesinghe chu an ram eibar dinhmun chhia duh loh vanga mipui lungawi lohna nasa tak kara president bân hnuah a ai lo awh lailawk turin lak luh a ni.
An ram mipuiten a chenna hmun thleng an luhchilh hnua Singapore-a tlanchhe ta, Gotabaya Rajapaksa a thlak dawn a ni.
A bân tak avang hian mipui an lawm hle a, curfew bawhchhiain Ningani zan khan an lawm.
Tar lan tawh thin angin Sri Lanka hi eibar dinhmun a chhe em em a, ei tur, tuialhthei leh ni tin mamawh an nei mang lo.
President thar tur hi parliament-ah Inrinni atang hian thlan tan a ni dawn a, MP-ten chawlhkar khat chhung velin an tifel ang.
Rorel lai party an tam ber a, an MP-ten Wickremesinghe-a hi an thlawp hmel a, ani hi Rajapaksa chhungkua nena inhnimhnai tak a ni.
Hetih lai hian Sri Lankan mipuite chuan an duh a rinawm loh hle a, Wickremesinghe-a ngei pawh hi mipuiten prime minister atanga bâng tura an nawr zinga mi a ni.
Kar tir lamah khan mipuiten prime minister hlui ni ta in hi luhchilh an tum a, venhim hnathawktute nen an innawr nasa hle.
Hetih hun laia lungawi lohna lantirtu zinga mi pakhat, Manuri Pabasari chuan Wickremesinghe-a bâng tura nawrna hi a thleng zui dawn tih a sawi lawk.
“Mipuite banphakin a awm lo va, Rajapaksa thlawptu langsar a ni bawk,” a ti a. “President leh prime minister thar chu Rajapaksa thlawptu an ni tur a ni lo,” a ti.
Central bank-a an governor, Nandalal Weerasinghe chuan sorkar ngialnghet a din thuai loh chuan an ram chu khar hmak a ngai dawn niin a sawi.
Tuialhthei leina turin ram dang pawisa an mamawh khawp an neih dan tur chiang engmah a la awm lo tih BBC-a Newsnight programme-ah a sawi a, sorkar nghet ding tur pawhin ram dang atanga puihna an mamawh thu a sawi.
Hetih lai hian Singapore chuan president paih thlak tak, Rajapaksa chuan an ram thleng tawh mah se hum tura tihna a la dil lo tih an sawi.
President hlui ni ta hi a nupui leh a bodyguard pahnih nen an lut a, dan anga an ram hotu ber nihna chelh theihna a nei tawh lo va, a himna tur ram a dap a ngai a ni.
Ni rei vak lo chhung chu Singapore-ah hian a awm rin a ni a, United Arab Emirates-ah emaw a kal leh a rinawm tih Sri Lankan venhim hnathawktute chuan AFP news agency an hrilh.