July 11, 2022 atanga state sorkara phut hrang hranga neia a huhoa chawlh la mek, NHM hnuai thawktute chu ni thum chhunga insawifiah tura lehkha pek an ni.
NHM Director Dr Eric Zomawia chuan Mizoram sorkara Health & Family Welfare department atanga thupek bawhzuiin, NHM hnuaia thawktu nuar mekte chu ni thum chhung phalna nei loa casual leave an lak avang leh hemi hnua NHM-a thawktu inzawmkhawm pawl, NEUM-in tiam chin awm loa a huhoa chawlh a huaihawt thlawpa hna an zawm loh avangin Mizoram Essential Maintenance Act, 1990 an bawhchhiat avangin, July 16, 2022 khan ni thum chhung insawi fiah turin thawktu mi mal tin hnena show cause notice a pe a ni.
NHM director hian hna an luh dawna an intiam tawhna angin bân theih leh kum khat thleng thleng lung in tantir theih an nih bakah Rs 2,000 chawitir theih an nih thu insawifiah tura lehkha a pekah a tar langin, a rang thei ang berin an hna chhunzawm tur leh hna atanga bân an nih lohna chhan tur ziaka insawifiah turin a hriattir a ni.
NHM hnuaia thawktute hian an thil phut hrang hrang avanga ni thum chhung hna thawk loa pisa kaia nawrh an huaihawt hnuah, July 11 atang khan a huhoa chawlh lain tiam chin awm loin an nuar a. Zirtawpni khan NEUM chuan thutkhawm hmanhmawh hoin sorkarah rawtna, ‘NEUM hamthatna tur zir chiang tura study group kal lai mek hi September, 2022 ral hmaa a peih fel hman ni rawh se’ tih te, ‘kan thawh hlawh hi thla tin regular takin min pe tawh rawh se’ tih leh ‘NHM hnuaia contractual staff-te hi MESMA order min puan khum tawh suh se,’ tihte chu tihhlawhtlinsak an nih chuan nawrh an chawlhsan tur thu an rel a ni.
Hetih lai hian, July 14 khan Health Department Principal Secretary Esther Lalruatkimi chuan thu thar thehdarhtute a kawmnaah NEUM-te chu damlote leh mipuite tawrhna a zual zel loh nan July 14, 2022 atanga dan pangngaia an hna chhunzawm tur leh hna zawm lo an awm a nih chuan an chungah sorkarin dan anga hma a lak tur thu te, Controlling Officer zawng zawngte chu anmahni chief medical officer theuh kaltlangin hna zawm leh zawm lote hming thlen thin turin a hriattir a ni.