Mizoram a football champion an awm dawn a, naktukah team 204 zinga a thiam ber an awm dawn. LBS Suzuki All Mizoram Inter Village Football Tournament 2022 final-ah Sialhawk VC team leh Champhai Kanan VC team an inkhel dawn.Final kalkawng
Sialhawk VC team hi tun tournament a team tan hlawh an ni a, an football khelh a nghet.
Tuikual North 5-1 a hnehin bul an tan a, Samtlang leh Selesih te 6-0 leh 13-0 in an hneh.
Kawnpui Venglai leh Mamit Jt. VC te 3-0 ve ve in an hneh a, quarter-final ah Farkawn VC chu 4-2 in an hneh ve leh bawk.
Lehlamah Champhai Kanan hi Champhai District a team tha an ni a. An district huap Inter Village tournament khel zo chiah an ni a, an fit that bakah an player-te an hriam.
Thenzawl East 10-2 a hnehin bul an tan a. Melbuk VC chu 2-1 a hneh lehin Serchhip Jt. VC team penalty in an hneh lehnghal.
Thakthing LC team 5-0 a an sawp hnuah penalty in Vaivakawn LC leh Republic Veng LC te an hneh leh ve ve bawk.Semi-final chu
Inkhel hmasa zawkah Sialhawk in star player R. Laldanmawia hmangin goal an khung thuai a. Minute 10-naah Crespo-a set piece vawrh luh a tauh lut.
Mahse minute 32-naah Ramhlun North tan striker tlanchak Lalrosanga chuan ‘through ball’ fing a hmuh chu ‘cial’ takin a khung a. Minute 69-naah Lalpekhlua Jongte ball pet chu dan pial niin Ramhlun North in hma an hruai a. Hei hi minute 86-naah Lalmuankima’n Sialhawk tan a sut ve leh a ni.
Extra time-ah goal a luh belh lova, chak zawk zawn nan penalty pet a ngai.
Sialhawk in an pet goal vek laiin Ramhlun North tan C.Lalmuanpuia leh Lalpekhlua ten an pet goal lova, 4-2 in Sialhawk an tling ta zawk.
Inkhel hnuhnung zawkah Champhai Kanan in rinkai leh team tha zinga dah Lengpui VC chu 2-1 in an hneh.
First half-ah team pahnih inkhel a hmuhnawm a, football ‘class’ sang tak an khel.
Minute 54-naah Champhai Kanan tan Lalchhawnkima ball siamsak chu Laltlanzova’n goal-ah a khung.
Hei hi minute 13-naah Jacob Lalrinnunga chuan freekick atanga ball kal chu chiang taka tauh lutin Lengpui tak a sut.
Mahse minute 87-naah Kimkima bawk inlar lehin Champhai Kanan chakna goal a khung.Inrinni semi-final result:
AR Lammual
Sialhawk 2-2 Ramhlun N(AET)
(R. Laldanmawia 10′, Lalmuankima 86′), (K. Lalrosanga 32′, Lalpekhlua Jongte 69′)
Penalty-ah Sialhawk VC 4-2 in an chak
Lengpui VC 1-2 Champhai Kanan VC(FT)
(Jacob Lalrinnunga 67′, Lalchhawnkima 87′ ), (Laltlanzova 53′)
Thawhlehni, July 19 Final :
AR Lammual
03:00 PM Sialkawh VC vs Champhai Kanan VC